રાજકોટમાં રસ્તા પર આખલો આડો ઉતરતા બાઈક સવાર વૃદ્ધનું કમકમાટીભર્યું મોત

રાજકોટ: રાજકોટમાં રખડતા ઢોરના ત્રાસને કારણે એક વૃદ્ધ જીવ ગુમાવવાનો વારો આવ્યો છે. પ્રાપ્ત માહિતી અનુસાર મંગળવારે રાતે વેપારી કમલભાઈ પટોડીયા (35) અને વિનુભાઈ મકવાણા (65) ચણીયાચોળીનું પાર્સલ આપવા મવડી તરફ જઈ રહ્યા હતા. ત્યારે વિશ્વેશ્વર મહાદેવ મંદિર પાસે સામેના રોડ પર બે આખલા વચ્ચે યુદ્ધ ચાલુ હતું અને બંને લડતા લડતા બાઇક પર બેઠેલા વિનુભાઈ અને કમલભાઇ પર પડ્યા હતા. ગંભીર ઈજાઓ થતાં બંનેને સારવાર માટે તાત્કાલિક હોસ્પિટલ ખસેડાયા હતા. જ્યાં વિનુભાઈનું ટૂંકી સારવાર દરમિયાન મોત થયું હતું જ્યારે કમલભાઈ હજી પણ સારવાર હેઠળ હોવાનું જાણવા મળ્યું છે.

ઉલ્લેખનીય છે કે, અગાઉ રખડતા ઢોરના ત્રાસ અંગે અનેક રજૂઆત થતાં ભાજપ પ્રદેશ પ્રમુખ સીઆર પાટીલને મનપાને આ અંગે કાર્યવાહી કરવા ટકોર કરી હતી. તેમ છતાંય આખલાની અડફેટે વૃદ્ધનું મોત થયા હવે એવું લાગી રહ્યું છે કે, મનપા ઊંઘમાં હોય તેવું લાગી રહ્યું છે.

પરિવારના જણાવ્યા અનુસાર રોડની સામેની સાઇડમાં બંને આખલા વચ્ચે યુદ્ધ શરૂ થતાં બંને સ્વબચાવમાં ઉભા રહ્યા હતા. પરંતુ બંને આખલા લડતા લડતા સ્વજનો પર પડ્યા હતા, જેમાં વિનુભાઈને ગંભીર ઈજાઓ થતાં મોત થયું હતું જ્યારે કમલભાઈને પાસળીઓ ભાંગી ગઈ છે. સ્વજન ગુમાવનાર પરિવારની માંગ છે કે, આખલાઓને પકડીને વ્યવસ્થિત જગ્યાએ મૂકો જેથી કરીને બીજાનો જીવ બચાવી શકાય.

મહત્વનું છે કે, રાજકોટ જ નહીં પરંતુ આખા ગુજરાતમાં રખડતા ઢોરોનો ત્રાસ હજી પણ યથાવત છે. જેના કારણે અનેક લોકો જીવ ગૂમાવી ચૂક્યા છે. આ અંગેની રજૂઆતો થતાં પાટીલે પણ મેયર સહિતના પદાધિકારીઓને વારંવાર ટકોર કરી ચૂક્યા છે. એટલું જ નહીં, રાજકોટ મુલાકાત દરમિયાન પાટીલે જાહેરમાં રખડતા ઢોર મુદ્દે પદાધિકારીઓના ક્લાસ લીધા હતા. તેમ છતાંય કોઈ કાર્યવાહી ન કરતા વૃદ્ધ મોતને ભેટ્યા છે.