રાજ્યસભાના સાંસદ અભય ભારદ્વાજ સહિત પરિવારના 4 સભ્યોનો કોરોના રિપોર્ટ પોઝિટિવ

રાજકોટઃ રાજ્યસભાના સાંસદ અભયભાઈ ભારદ્વાજ અને તેમના પુત્ર અંશનો કોરોના રિપોર્ટ પોઝિટિવ આવ્યો છે. જેને લઈને તેમને સારવાર માટે સિવિલ હોસ્પિટલમાં દાખલ કરવામાં આવ્યા છે.

રાજ્યમાં કોરોના કેસ દિવસેને દિવસે વધી રહ્યા છે ત્યારે સુરત મજૂરાના ધારાસભ્ય બાદ હવે રાજકોટ ભાજપના નેતા અને રાજ્યસભાના સાંસદ અભય ભારદ્વાજને કોરોના વાયરસનો ચેપ લાગ્યો છે. ભારદ્વાજ સાથે તેમના પુત્ર અંશનો પણ કોરોના રિપોર્ટ પોઝિટિવ આવ્યો છે. અભય ભારદ્વાજને કોરોના થતા તેમની પુત્રી આશકા અને પુત્ર હોમ ક્વોરન્ટાઇન થયા છે. સાંસદને હાલ સારવાર માટે સિવિલ હોસ્પિટલમાં દાખલ કરવામાં આવ્યા છે.

ઉલ્લેખનીય છે કે અભય ભારદ્વાજના પરિવારના ચાર સભ્યોને કોરોના થયા બાદ હવે રાજકોટ ભાજપ અગ્રણી નીતિન ભારદ્વાજ પણ કોરોના ટેસ્ટ કરાવશે. ઉલ્લેખનીય છે કે થોડા દિવસ પહેલા ભાજપના પ્રદેશ પ્રમુખ સી.આર. પાટિલ રાજકોટ આવ્યા ત્યારે અભય ભારદ્વાજ પણ હાજર રહ્યા હતા.