કેદારનાથ યાત્રા પર ગયેલા સુરેન્દ્રનગરના 3 મિત્રોની કાર ખીણમાં ખાબકી, એકનું મોત

સુરેન્દ્રનગર: ઉત્તરાખંડ ફરવા ગયેલા સુરેન્દ્રનગરના 3 મિત્રોને અકસ્માત નડ્યો હતો. મળતી માહિતી પ્રમાણે તેમની કાર અલકનંદાની ખીણમાં ખાબકી હતી, જેમાં એક યુવકનું મોત નીપજ્યું છે અને બે લાપતા હોવાનું સામે આવ્યું છે. મીડિયા રિપોર્ટ મુજબ સુરેન્દ્રનગર જિલ્લા ભાજપના 3 યુવા હોદેદારો કેદારનાથની યાત્રા કરવા ગયા હતા. જ્યાંથી દહેરાદૂન પરત ફરતા જોશીમઠ પાસે તેમની કાર પુલ પરથી પસાર થતી વખતે વળાંકમાં અચાનક સ્ટિયરીંગ પરનો કાબુ ગુમાવવાથી કાર ઉંડી ખીણમાં ખાબકતા ગંભીર અકસ્માત સર્જાયો હતો.

પરિવારમાં છવાયો શોકનો માહોલ
મીડિયા રિપોર્ટ મુજબ જિલ્લા યુવા ભાજપ પ્રમુખનું ઘટનાસ્થળે મોત થયું હતું. જ્યારે લીંબડી તાલુકા યુવા ભાજપ પ્રમુખ અને કાર ચાલક લાપતા છે. ગંભીર અકસ્માતમાં જિલ્લા ભાજપ મહામંત્રીનો આબાદ બચાવ થયો હતો. અકસ્માતની જાણ થતાં જિલ્લા ભાજપની સાથે પરિવારજનોમાં પણ શોકનો માહોલ છવાઈ ગયો છે. બનાવની જાણ થતાં કેન્દ્રીય મંત્રી મનસુખ માંડવીયાએ પણ ઉત્તરાખંડમાં અધિકારી સાથે વાતચીત કરી હતી.

કેવી રીતે સર્જાયો અકસ્માત?
સ્થાનિક મીડિયા રિપોર્ટ મુજબ ત્રણેય મિત્રો હરિદ્વાર, બદ્રીનાથ અને કેદારનાથની યાત્રાએ જવા માટે રવાના થયા હતા. ત્યારબાદ દેહરાદુનથી હેલિકોપ્ટરમાં બેસીને કેદારનાથ અને બદ્રીનાથની યાત્રા કરીને કારમાં બેસીને પરત ફરતા હતા. ત્યારે જોશીમઠ પાસે વળાંકમાં આવેલા પુલ પર અચાનક કીચડ આવતા ડ્રાઈવરે કાબૂ ગુમાવ્યો હતો જેથી કાર અલકનંદાની ખીણમાં ખાબકી હતી.

અકસ્માતમાં એકનું મોત, બે લાપતા
બનાવની જાણ થતાં SDRF સહિતની ટીમે ઘટનાસ્થળે પહોંચી વધુ તપાસ હાથ ધરી હતી. તપાસ દરમિયાન એક યુવકનું મોત થયું હતું જ્યારે અન્ય એકનો આબાદ બચાવ થયો હતો. જો કે, અન્ય એક યુવક અને ડ્રાઈવર લાપતા હોવાનું જાણવા મળ્યું છે. કાર 300 મીટર ઊંડી ખીણમાં ખાબકી હોવાથી નદીના ધસમસતા પ્રવાહમાં લાપતા ડ્રાઈવર અને અન્ય એક યુવકને શોધવામાં મુશ્કેલી થઈ રહી છે.