લવમેરેજ સામે પરિવારને વાંધો પડતા દીકરી-જમાઈને ઉઠાવી ઢોર માર માર્યો

રાજકોટ: છોકરીના પરિવારજનોની ઈચ્છા વિરુદ્ધ લગ્ન કરનારા એક કપલને ગુરુવારે રાત્રે છોકરીના કાકાઓ અને ભાઈઓએ અપહરણ કરી માર માર્યો હોવાની ઘટના સામે આવી છે. પોલીસના જણાવ્યા અનુસાર, ઉદય ચોટલિયા અને નીધિ ભાલોડીને પકડીને મટોડા ગામમાં માર મારવામાં આવ્યો હતો.

પોલીસ ફરિયાદમાં આ અંગે કિશોર ભાલોડી, પરેશ ભાલોડી, અશ્વિન ભાલોડીના નામનો ઉલ્લેખ કરાયો છે જે તમામ નીધિના કાકા થાય છે. આ સિવાય હાર્દિક ભાલોડી નામના નીધિના ભાઈ સામે પણ ફરિયાદ નોંધાવાઈ છે. નીધિએ પોતાના પરિવારજનોની ઈચ્છા વિરુદ્ધ ઉદય સાથે 2019માં લગ્ન કરી લીધા હતા.

ગુરુવારે સાંજે નીધિના કાકા અને ભાઈ આશઆપુરા નગરમાં આવેલા હુડકો ક્વાર્ટર સ્થિત ઘરે પહોંચ્યા હતા. જ્યાં તેમણે નીધિની માતા બીમાર હોવાનું કહી તેને પોતાની સાથે આવવાનું કહ્યું હતું. જોકે, તેમણે નીધિ પોતાના પતિ સાથે નહીં આવી શકે તેવી વાત કરતા નીધિએ પતિ વિના તેમની સાથે આવવાનો ઈનકાર કરી દીધો હતો.

નીધિએ આવવાની ના પાડી દેતા ઘરમાં જ ઝપાઝપી થઈ હતી, જેમાં નીધિના સાસુને ઈજા થઈ હતી. આ દરમિયાન નીધિ અને ઉદયને ગાડીમાં બળજબરીપૂર્વક બેસાડીને રાજકોટની બહાર મેટોડા ગામે લાવવામાં આવ્યા હતા. નીધિ અને ઉદયને બળજબરીપૂર્વક ઉઠાવાઈ ગયા હોવાની માહિતી નીધિના સાસુએ તરત જ પોલીસને જણાવી હતી, જેનાથી પોલીસ એક્શનમાં આવી ગઈ હતી.

સીસીટીવી ચેક કરી પોલીસે આરોપીઓની ઓળખ કરી લીધી હતી, અને તેમના મોબાઈલ લોકેશનને આધારે મેટોડા ગામે પહોંચીને નીધિ તેમજ તેના પતિને છોડાવ્યા હતા. ભક્તિનગર પોલીસ સ્ટેશનના પીએસઆઈ એસએન જાડેજાના જણાવ્યા અનુસાર, નીધિના ભાઈ અને એક કાકાની આ મામલે ધરપકડ કરાઈ છે. નીધિ અને ઉદયને માર મરાયો હોવાથી તેમને સામાન્ય ઈજા થઈ હોવાનું પણ તેમણે જણાવ્યું હતું.