રાજકોટઃ નશામાં બેફામ BMW કાર ચલાવતા ડોક્ટરે બાઈક ચાલકને અડફેટે લેતા મોત, ડોક્ટરની ધરપકડ

રાજકોટ: શહેરના અમુલ સર્કલ નજીક BMW કાર અને બાઈક વચ્ચે અકસ્માત સર્જાયો હતો. જેમાં બાઈકચાલકનું ઘટનાસ્થળે જ મોત નીપજ્યું હતું. મૃતક કોર્પોરેશનનો કર્મચારી હોવાનું સામે આવ્યું છે. BMW ચાલક યુવક ડોક્ટર લક્કીરાજ અકલવિયા હોવાનુ સામે આવ્યું છે. કાર ચલાવતી વખતે તે નશામાં હતો. પોલીસે તેની ધરપકડ કરી લીધી છે.


BMW કાર ચાલક લક્કીરાજ અકવાલિયા એર ઓર્થોપેડિક ડૉક્ટર છે. લક્કીરાજે કેફી પદાર્થ પીધું હોવાનું જાણવા મળી રહ્યું છે. જેના કારણે નશામાં કાર પરથી કાબુ ગુમાવતા અકસ્માત સર્જાયો હતો. જ્યારે મૃતક જયંતિભાઇ રાઠોડ રૈયા ગામના રહેવાસી છે. તેઓ કોર્પોરેશનમાં ઢોર પકડતા કર્મચારીની નોકરી કરતા હતા. તેઓ પોતાનું કામ પતાવીને બાઇક પર પોતાના ઘરે જઇ રહ્યાં હતાં, ત્યારે અકસ્માત સર્જાયો હતો. હાલ પોલીસે કારચાલક લક્કીરાજની ધરપકડ કરી આગળની કાર્યવાહી હાથ ધરી છે.


આ અંગે પોલીસ અધિકારીઓનું કહેવું છે કે, BMW કાર ચાલકે ખૂબ જ બેદરકારીથી અને પીધેલી હાલતમાં કાર ચલાવી હતી. તેણે બાઈકચાલકને અડફેટે લીધો હતો. આ ઘટનામાં બાઈકચાલકનું મોત નીપજ્યું હતું. આજે કારચાલકની 304 મુજબ ધરપકડ કરી કાયદેસરની કાર્યવાહી કરવામાં આવી છે.