દ્વારકામાં ઉદ્યોગપતિના દીકરાના રિસેપ્શનમાં ગીતા રબારીનો કાર્યક્રમ, ઉમટી જોરદાર ભીડ

અમદાવાદ: કોરોના મહામારીના કારણે સરકારે લગ્ન અને મરણ પ્રસંગે ભીડ એકઠી ન થયા તે માટે કેટલાક નિયમો બનાવ્યા છે. પરંતુ આ નિયમો માત્ર સામાન્ય લોકો માટે જ હોય અને નેતાઓ તેમજ પૈસાદારોને કાયદાની કોઈ બીક ન હોય તેવું ચિત્ર ઉપસી રહ્યું છે. તાજેતરમાં જ ભાજપના પૂર્વ ધારાસભ્ય કાંતિ ગામિતના ઘરે લગ્ન પ્રસંગમાં 6 હજારથી વધુ લોકો ભેગા કરાયા હતા. તો હવે, દ્વારકામાં એક ઉદ્યોગપતિના પુત્રના રિસેપ્શનમાં કોરોના ગાઈડલાઈનના ધજાગરા ઉડાવાયા હોવાનું સામે આવ્યું છે. આ પ્રસંગમાં ગીતા રબારીનો કાર્યક્રમ આયોજિત કરાયો હતો અને તેમાં સંખ્યાબંધ લોકો ગરબે ઘૂમ્યા હતા. એટલું જ નહીં, ભાજપના સાંસદ પૂનમ માડમ પણ માસ્ક પહેર્યા વિના જોવા મળ્યા હતા.

દેવભૂમિ દ્વારકામાં નવી મોવાણ ગામે ઉદ્યોગપતિ ભીખુભાઈ ગોજીયાના પુત્ર નિર્મલનું ગઈકાલે 1લી ડિસેમ્બરે રિસેપ્શન યોજાયું હતું. જેમાં સિંગર ગીતા રબારીનો ગરબાનો કાર્યક્રમ રખાયો હતો. આ પ્રસંગે મોટી સંખ્યામાં લોકો ઉપસ્થિત રહ્યા હતા અને ગરબે ઘૂમ્યા હતા. ભાજપના સાંસદ પૂનમ માડમ પણ માસ્ક વિના જોવા મળ્યા હતા. આ ભવ્ય રિસેપ્શનમાં ગીતા રબારી પર રૂપિયાનો વરસાદ જોવા મળ્યો હતો. આ કાર્યક્રમનો વિડીયો અને ફોટા સોશિયલ મીડિયા પર વાયરલ થયા છે.

સમર્થ ગ્રુપ ઓફ કંપનીના માલિક ભીખુભાઈ ગોજીયાના પુત્ર નિર્મલ હોલિકોપ્ટરમાં લગ્ન કરવા પહોંચ્યો હતો, તેની તસવીરો પણ સોશિયલ મીડિયામાં ઘણી ફરતી થઈ હતી. હવે તેના લગ્નના રિસેપ્શનમાં કોરોના ગાઈડલાઈનના ધજાગરા ઉડાવાયા હોવાના વિડીયો અને તસવીરો વાયરલ થયાં છે.

આ રિસેપ્શનમાં કોરાનાની કોઈ ગાઈડલાઈનનું પાલન થયું ન હતું. મોટાભાગના લોકો માસ્ક વિના જોવા મળ્યા હતા. સોશિયલ ડિસ્ટન્સ પણ જળવાયું ન હતું. સૌથી મોટી વાત તો એ છે કે, સોશિયલ ડિસ્ટન્સ અને કોવિડ ગાઈડલાઈન્સ અંગે જાગૃતિ ફેલાવનારા કલાકાર ગીતા રબારીના જ કાર્યક્રમમાં કોરોની બધી ગાઈડલાઈનનો ભંગ કરાયો હતો.

ભાજપના નેતા કાંતિ ગામિત અને તેમના પુત્ર સામે નોંધાઈ ફરિયાદજણાવી દઈએ કે, તાજેતરમાં જ દક્ષિણ ગુજરાતમાં તાપીમાં ભાજપના પૂર્વ ધારાસભ્ય કાંતિ ગામિતની પૌત્રીની સગાઈમાં 6 હજારથી વધુ લોકોને એકઠા કરાયાનો વિડીયો બહાર આવ્યો હતો. જે મામલે સરકારની ઘણી ટીકાઓ થઈ છે. વિવાદ વધતા કાંતિ ગામિતે પોતાની ભૂલ થયાનું સ્વીકારી માફી માગી લીધી હતી પરંતુ હાઈકોર્ટે આ મામલાને સુઓમોટો તરીકે લીધો છે. તેને પગલે મોડે મોડે જાગેલા તાપીના પોલીસવડાએ આ મામલે કાર્યવાહી કરતા ફરિયાદ નોંધવામાં આવી છે. આ મામલે કાંતિ ગામિત અને તેમના પુત્ર સહિત 18 લોકો સામે ફરિયાદ નોંધાઈ છે અને તમામની સોનગઢ પોલીસે ધરપકડ કરી છે.