500, 2000ની જ નહીં, 100 અને 200ની નકલી નોટો પણ બજારમાં ફરે છે!

રાજકોટ: 2000 અને 500ની નવી નોટો આવ્યે હજુ માંડ બે વર્ષ થયા છે. નવી નોટોના સિક્યોરિટી ફીચર્સ કોપી કરવા અશક્ય હોવાના દાવા પણ કરાયા હતા, જોકે અત્યાર સુધીમાં 500 અને 2000ની નકલી નોટો પકડાયાના અનેક કેસ નોંધાઈ ચૂક્યા છે. 500 અને 2000 ઉપરાંત 100 અને 200 રુપિયાની નવી નોટો પણ ચલણમાં મૂકાઈ હતી. જોકે, ચોંકાવનારી વાત એ છે કે, હવે 500 અને 2000 જેવી મોટી નોટો જ નહીં, પરંતુ 100 અને 200 રુપિયા જેવી નાના ચલણની નોટોની પણ કોપી થવા લાગી છે. અમરેલી લોકલ ક્રાઈમ બ્રાંચના હાથે આવી જ 2.21 લાખ રુપિયાની નકલી નોટો ઝડપાઈ છે. જેમાં 500 અને 2000 ઉપરાંત 100 અને 200ની નોટોનો પણ સમાવેશ થાય છે. પ્રાપ્ત માહિતી અનુસાર, ધારીમાંથી પોલીસે આ નકલી નોટો તેમજ પ્રિન્ટરને ઝડપી પાડ્યા હતા.