રાજકોટની પ્રખ્યાત ચીકીનો સ્વાદ હવે આખું વર્ષ તમે માણી શકશો

નિમેશ ખાખરિયા, રાજકોટ: ગોળ અને શીંગદાણામાંથી બનતી ચીકીનો સ્વાદ દાઢે વળગે છે. આ ચીકીના ઉદ્યોગ પર હવે ભારતના 'કેન્ડી મેન' ધનજીભાઈ પટેલની નજર છે. ધનજીભાઈ રાજકોટની પ્રખ્યાત ચીકીનું ઓટોમેટિક મશીનો દ્વારા મોટાપાયે ઉત્પાદન કરવા માગે છે. અત્યાર સુધી ચીકી પરંપરાગત રીતે નીચે પાથરીને મોટા વેલણથી વણીને બનાવાતી હતી પરંતુ હવે મશીનથી ઉત્પાદન થશે.

ધનજી પટેલનું મેક્સન ગ્રુપ કોન્ટ્રાક્ટના આધારે કેન્ડીનું ઉત્પાદન કરતું સૌથી મોટું ગ્રુપ છે. તેમના ક્લાયન્ટમાં ટોચની રાષ્ટ્રીય અને આંતરરાષ્ટ્રીય બ્રાન્ડ જેવી કે, કેડબરી, નેસ્લે, હર્શીઝ અને પાર્લે છે. સુરેન્દ્રનગર જિલ્લાની વઢવાણ બેઠક પરથી ભાજપના ધારાસભ્ય ધનજી પટેલે કહ્યું, "ભારતમાં મોટા પ્રમાણમાં ચીકીનું ઉત્પાદન કરવા માટે મોટા ઓટોમેટિક મશીનો નથી. અમે આવું એક મશીન વિકસાવ્યું છે અને બીજું જર્મનીથી આવેલું મશીન નાસ્તો બનાવતી જાણીતી કંપની બાલાજી વેફર્સ તરફથી આપવામાં આવ્યું છે."

હકીકતે હવે નાસ્તાની સંગઠિત કંપનીઓ ચીકીના ઉત્પાદન તરફ નજર દોડાવી રહી છે. સુરેન્દ્રનગરમાં મેક્સનનું હેડક્વાર્ટર્સ આવેલું છે. મેક્સનને નાસ્તો ઉત્પાદિત કરતી ઓછામાં ઓછી બે મોટી કંપનીઓ તરફથી ચીકી બનાવવાનો કોન્ટ્રાક્ટ મળ્યો છે, જેમાંથી એક બાલાજી વેફર્સ છે. રાજકોટની બાલાજી વેફર્સ આ પરંપરાગત મિષ્ટાન્ન બનાવવાનું ધ્યેય લાંબા સમયથી રાખીને બેઠી છે. બાલાજી વેફર્સના ફાઉન્ડર અને ડાયરેક્ટર ચંદુ વિરાણીએ કહ્યું, "અમે ધનજીભાઈ સાથે હાથ મિલાવવા માગતા હતા. અમારી પાસે મશીનરી અને જગ્યા છે પરંતુ એક કે બીજા કારણોસર આ પ્રોજેક્ટ શરૂ જ નહોતો થઈ શકતો. પરંતુ આ વખતે અમને વિશ્વાસ છે કે સફળ થઈશું." ચંદુભાઈએ શરૂઆતમાં આ પ્રોજેક્ટ પાછળ માત્ર 25 કરોડ રૂપિયા રોકવાની યોજના બનાવી હતી.

ચંદુભાઈએ આગળ કહ્યું, "અન્ય જાણીતા નાસ્તા અને મિષ્ટાનોની જેમ ચીકી બધે ઉપલબ્ધ નથી. તેની ઉપલબ્ધિ સ્થાનિક બજારો સુધી મર્યાદિત છે. અમે વિવિધ પ્રદેશોમાં ચીકી વેચાય તેવું લક્ષ્ય રાખ્યું છે." આ ફિસ્કલ વર્ષના અંત સુધીમાં ચીકી બજારમાં લાવવાની બાલાજીની યોજના છે. ઉલ્લેખનીય છે કે, રાજકોટની ચીખી ખૂબ વખણાય છે પરંતુ તેઓ સ્થાનિક બજારમાં જ વેચાય છે. તેની પ્રતિ કિલો કિંમત પણ 300-400 રૂપિયા છે.

જલારામ ચીકીના માલિક પ્રકાશ ચોટાઈએ કહ્યું, "રાજકોટ 250 ચીકી ઉત્પાદકોનું ઘર છે. તેઓ શિયાળામાં દરરોજ 200-400 કિલોગ્રામ ચીકીનું ઉત્પાદન કરે છે. ખૂબ ઓછા ચીકી ઉત્પાદકો આખું વર્ષ ચીકી બનાવી શકે તેટલી ક્ષમતા ધરાવે છે."