જામનગર-ખંભાળિયા હાઈવે પર સિક્કા પાટિયા પાસે આવેલી હોટલ એલેન્ટામાં ગુરુવારે મોડી સાંજે એકાએક આગ ફાટી નીકળી હતી. આગ એટલી વિકરાળ હતી કે, જોત-જોતામાં આખી હોટલને ઝપેટમાં લઈ લીધી હતી. આગને ઓલવવા માટે રિલાયન્સ, જીએસએફસી અને જામનગર ફાયરબ્રિગેડની ટીમો દોડી આવી હતી. લગભગ બે કલાકની જહેમત પછી આગ કાબુમાં લઈ શકાઈ હતી. 10 જેટલી એમ્બ્યુલન્સ પણ ઘટનાસ્થળે રવાના કરવામાં આવી હતી.
પોલીસના જણાવ્યા મુજબ, હોટલમાં કુલ 18 રૂમમાં 27 જેટલા લોકો ફસાયા હતા, જેમનું રેસ્ક્યુ કરી લેવાયું હતું. જામનગર એસપી પ્રેમસુખ ડેલુએ જણાવ્યું કે, સદનસીબે આગમાં કોઈ જાનહાનિ થઈ નથી અને કોઈને ઈજા પણ થઈ નથી. તેમના કહેવા મુજબ, ત્રણ લોકો આગને કારણે ગભરાઈ ગયા હોવાથી એ લોકોને હોસ્પિટલે લઈ જવાયા હતા. જોકે, એ ત્રણ લોકને પણ કોઈ પ્રકારની ઈજા થઈ નથી. એસપીએ જણાવ્યું કે, હોટલમાં કુલ 36 રૂમ છે અને તેમાંથી 18 રૂમમાં લોકો રોકાયેલા હતા. આગ લાગતા ફાયર એલાર્મ વાગ્યું હતું, જેથી બધા લોકો રૂમની બહાર દોડી આવ્યા હતા. બાદમાં એ બધાનું રેસ્ક્યુ કરી લેવાયું હતું.
આ આગને પગલે વિસ્તારમાં અફરા-તફરી મચી ગઈ હતી. આગ હોટલની આસપાસના વિસ્તારમાં ફેલાઈ હોત તો ઘણું મોટું નુકસાન થયું હોત. પરંતુ સદનસીબે એવું કંઈ થાય તે પહેલા જ આગ પર કાબુ મેળવી લેવાયો હતો.