ભારે પવન ફુંકાતા ગિરનાર રોપવે સર્વિસ સવા કલાક માટે બંધ રાખવી પડી

જૂનાગઢ: દિવાળીની રજાઓમાં મોટી સંખ્યામાં પ્રવાસીઓ ગિરનાર પર્વત પર નવા-નવા શરુ થયેલા રોપવેમાં બેસવા આવી રહ્યા છે, ત્યારે શુક્રવારે ભારે પવન ફુંકાવાને કારણે રોપવે સર્વિસને એક કલાકથી પણ વધુ સમય સુધી બંધ રાખવાની ફરજ પડી હતી.

પ્રાપ્ત વિગતો અનુસાર, રોપવે માટે બનાવાયેલા ટાવર નંબર સાત અને આઠ વચ્ચે પવનની ઝડપ 70 કિમી પ્રત કલાકની હોવાનું સેન્સરમાં નોંધાયું હતું. જેનાથી રોપવેના સંચાલકો હરકતમાં આવી ગયા હતા. જો આટલા પવન વચ્ચે રોપવે ચલાવવામાં આવે રોપવેની ટાવર સાથે અથડાઈ શકે છે.

સૂત્રોનું માનીએ તો, પવનની ગતિ 40 કિમી પ્રતિ કલાકથી વધી જાય તો પણ રોપવે સર્વિસ અટકાવી દેવામાં આવે છે. જોકે, શુક્રવારે પવન તેનાથી પણ ખૂબ જ ઝડપી હોવાથી સલામતીના કારણોસર રોપવેનું સંચાલન એક કલાક અને 20 મિનિટ સુધી બંધ કરાયું હતું. આખરે પવનની ગતિ સામાન્ય થયા બાદ ફરી 9 વાગ્યે તેનું સંચાલન શરુ કરાયું હતું.

ગિરનાર રોપવે સર્વિસને પર્યટકોનો જોરદાર પ્રતિસાદ મળી રહ્યા છે. રોજના હજારો લોકો તેની રાઈડની મજા માણી રહ્યાં છે, અને ટિકિટ ખરીદવા તેમજ રોપવેમાં બેસવા લાંબી-લાંબી લાઈનો લાગી રહી છે. જોકે, દિવાળીની રજાઓમાં રોપવે બંધ કરવાની નોબત આવતા લોકોને ખાસ્સો સમય રાહ જોવી પડી હતી.

ગઈકાલે ભવનાથમાં પાંચ હજારથી પણ વધુ પ્રવાસીઓ ઉમટી પડ્યા હતા. રોજની માફક શુક્રવારે પણ ટિકિટ અને રાઈડ માટે લાંબી લાઈન હતી તે વખતે જ ભારે પવનને કારણે સર્વિસ રોકવી પડશે તેવી જાહેરાત થતાં મુસાફરો અકળાયા હતા.

ગિરનાર રોપવેનું બે તરફનું ભાડું પુખ્તો માટે 700 રુપિયા અને બાળકો માટે 300 રુપિયા છે. જ્યારે એક તરફની રાઈડ માટે આખી ટિકિટ 400 રુપિયા અને બાળકો માટે 354 રુપિયાની છે. રોપવે શરુ થઈ ત્યારે ટિકિટના ભાવ ઘણા વધારે હોવાની ફરિયાદો ઉઠી હતી, અને તેને ઘટાડવા માટે જલદ માંગ શરુ થઈ હતી.

ગુજરાતમાં ગિરનાર ઉપરાંત, પાવાગઢમાં પણ રોપવે છે. પાવાગઢના રોપવેની લંબાઈ 736 મીટર છે (એક હજાર મીટર બરાબર એક કિલોમીટર). જ્યારે ગિરનારનો રોપવે તેના કરતા ત્રણ ગણો લાંબો એટલે કે 2330 મીટર છે. જોકે, બંનેની ટિકિટના દરમાં તફાવત લંબાઈની સરખામણીમાં ઘણો વધારે છે.