એશિયાડઃ ભૂજના તીર્થ મહેતાએ હેર્થસ્ટોન ગેમમાં મેળવ્યો બ્રોન્ઝ

I am Gujarat

હેર્થસ્ટોન ગેમમાં મેળવી સિદ્ધિ

જાકાર્તાઃ ઈન્ડોનેશિયામાં થઈ રહેલી એશિયન ગેમ્સ 2018માં ભારત જ્વલંત સફળતા મેળવી રહ્યું છે. 18 ઓગસ્ટથી શરુ થયેલી આ ઈવેન્ટમાં ભારતનું અત્યાર સુધીનું પ્રદર્શન સારુ રહ્યું છે. ભારતને પહેલો ગોલ્ડ રેસલર બજરંગ પુનિયાએ અપાવ્યો હતો. આ એશિયન ગેમ્સમાં ભૂજના તીર્થ મહેતાએ બ્રોન્ઝ મેળવ્યો છે. તીર્થ મહેતાએ હેર્થસ્ટોન ગેમમાં બ્રોન્ઝ મેડલ મેળવ્યો હતો.

બ્રોન્ઝ પર કબજો

તીર્થે વિએતનામના ખેલાડીને હરાવીને બ્રોન્ઝ મેડલ પર કબજો કર્યો હતો. તીર્થ ભૂજનો રહેવાસી છે અને તેણે ઈન્ફર્મેશન ટેક્નોલોજીમાંથી પોતાનું માસ્ટર્સ પુરું કર્યું છે. 2017માં યોજાયેલી હર્થસ્ટોન વર્લ્ડ ચેમ્પિયનશિપમાં ક્વોલિફાઈ કર્યું હતું. આ પહેલા એક ઈન્ટરવ્યૂમાં તીર્થે જણાવ્યું હતું કે,’મારા પેરેન્ટ્સ મને દરેક ટૂર્નામેન્ટ સમયે ખૂબ જ સપોર્ટ કરે છે. તેમના વગર હું આગળ વધી શક્યો નહોત.’

મુખ્યમંત્રીએ પાઠવી શુભેચ્છા

તીર્થે મેળવેલી આ સિદ્ધિ બદલ ગુજરાતના મુખ્યમંત્રી વિજયભાઈ રુપાણીએ પણ તેને શુભેચ્છા પાઠવી હતી. નોંધનીય છે કે આ પહેલા ડાંગની એથ્લિટ સરિતા ગાયકવાડે 400 મીટર રીલે રેસમાં ગોલ્ડ મેડલ જીત્યો હતો. સરિતાએ ટીમ ઈવેન્ટમાં ગોલ્ડ જીત્યો હોવાથી સરકારે તેને એક કરોડનું ઈનામ પણ જાહેર કર્યું છે.