ભારે પવન સાથે સતત ત્રીજા દિવસે જુનાગઢમાં ધોધમાર વરસાદ

હવામાન ખાતાની આગાહીના પગલે સૌરાષ્ટ્રમાં ક્યાંક ક્યાંક હળવા ઝાપટા જોવા મળ્યા છે પરંતુ જુનાગઢમાં તો સતત ત્રીજા દિવસે બપોર પછી વરસાદ ત્રાટક્યો હતો. સમી સાંજે ભારે પવન ફૂંકાવાનું શરુ થયું હતું અને સાથે જ વરસાદે લોકોની મુશ્કેલી વધારી હતી. સાંજે ધીમા ધીમા વાદળા આકાશમાં ચડી આવ્યા હતા અને પછી એકાએક જ વરસાદ ત્રાટક્યો હતો. ત્રણ દિવસથી પડી રહેલા વરસાદે ખેડૂતોની ચિંતામાં વધારો કર્યો છે.

માંગનાથ બજારમાં પાણી જ પાણી
જુનાગઢની માંગનાથ બજારમાં ગોઠણ સમાણા પાણી ભરાઈ ગયા હતાં. ભરબજારમાં જાણે નદી વહેતી હોય તેવા દ્રશ્યો સર્જાયા હતાં. ખરીદી કરવા આવેલા લોકોને ભારે મુશ્કેલીનો સામનો કરવો પડ્યો હતો. આ ઉપરાંત શહેરના મધ્યમાં આવેલું નરસિંહ તળાવ પણ છલોછલ ભરાઈ ચૂક્યું હતું.


પાંચ દિવસની છે આગાહી
હવામાન ખાતાએ સૌરાષ્ટ્ર અને દક્ષિણ ગુજરાતમાં આગામી પાંચ દિવસ સુધી વરસાદની આગાહી કરી છે ત્યારે સતત ત્રીજા દિવસે જુનાગઢમાં બપોર પછી અચાનક જ વાતાવરણમાં પલટો આવ્યો હતો અને ઠંડા પવનો ફૂંકાવાનું શરુ થયું હતું. જે પછી ધીરે ધીરે છાંટા આવવાના શરુ થયા અને સાંજે અચાનક જ ધોધમાર વરસાદ ત્રાટક્યો હતો.

વિડીયોઃ જુનાગઢમાં ત્રીજા દિવસે ધોધમાર વરસાદ ત્રાટક્યો