માસ્ક વિના પોતાની સાથે ફરતી પત્ની પર અકળાયો પતિ, રોડ પર જ લાફો માર્યો

રાજકોટઃ કોરોના વાયરસને રોકવા માટે જે રીતે માસ્ક અને સોશિયલ ડિસ્ટન્સિંગ મહત્વના માનવામાં આવી રહ્યા છે ત્યારે વાયરસને વધારે વકર્તો અટકાવવા માટે પોલીસ તથા કોવિડ ટીમ દ્વારા માસ્ક વગર ફરતા લોકોને દંડ કરીને કાર્યવાહી કરવામાં આવી રહી છે. આવામાં રાજકોટમાં માસ્ક વગર બહાર ફરતી પત્ની પર પતિ અકળાઈ ગયો હોવાનો રાજકોટનો વીડિયો વાયરલ થઈ રહ્યો છે. પતિ-પત્ની માસ્ક મુદ્દે રોડ પર જ ઝઘડતા દેખાયા બાદ પોલીસે બન્નને સમજાવવાની પણ કોશિશ કરી હતી.

સ્થાનિક મીડિયા રિપોર્ટ્સ અનુસાર રાજકોટના ત્રિકોણીય બાગ પાસેનો આ વીડિયો છે, જેમાં એક પુરુષ મહિલાને માસ્ક પહેરવા માટે કહી રહ્યો છે અને મહિલા માનતી ના હોવાથી તે વ્યક્તિ ગુસ્સે ભરાઈ જાય છે. જ્યારે પોલીસે મોટરસાઈકલ પર જતા પતિ-પત્નીને રોક્યા તો પતિએ પત્નીને માસ્ક રહેરવા માટે કહ્યું હતું. પરંતુ હઠે ચડેલી મહિલાએ પતિની વાત માનવાનો ઈનકાર કરીને માસ્ક રહેરવાની ના પાડી દીધી હતી. આ પછી પતિ પોલીસની હાજરીમાં જ પત્ની પર ગરમ થઈ ગયો હતો.

માસ્ક વગર ફરતી મહિલાને પતિએ પહેલા તો શાંતિથી સમજાવવાની કોશિશ કરી હોવાનું રિપોર્ટ્સમાં જાણવા મળી રહ્યું છે, આ પછી પતિએ ગુસ્સે થઈને પોલીસની હાજરીમાં જ પતિની ને માસ્ક રહેરવા માટે કહેવા છતાં વાત ના માનવા બદલ ગુસ્સામાં લાફો મારી દીધો હતો. આ જોઈને પોલીસે બન્નેને સમજાવવા માટે વચ્ચે પડવું પડ્યું હતું. આ ઘટનાનો વીડિયો વાયરલ થઈ રહ્યો છે.

મહત્વનું છે કે કોરોના વાયરસ વકરવાના કારણે અમદાવાદ, સુરત, રાજકોટ અને વડોદરામાં રાત્રિ કર્ફ્યૂ લાદવામાં આવ્યો છે આવામાં લોકોને જરુરી કામ વગર બહાર ના નીકળવા માટે સૂચના આપવામાં આવી છે, આ દરમિયાન માસ્ક વગર ફરતા અને સોશિયલ ડિસ્ટન્સિંગનો ભંગ કરનારા સામે કાર્યવાહી કરવામાં આવશે.