મોરબી: પરિવારને આર્થિક મદદ કરવા શિક્ષિકાઓએ સેવ-ગાંઠિયા બનાવીને વેચવાનું શરૂ કર્યું

મોરબીની ઓમશાંતિ સ્કૂલમાં ભણાવતી 10 જેટલી શિક્ષિકાઓએ કોરોનાકાળમાં કમાણી માટે તહેવારની સીઝનમાં ફરસાણ બનાવીને વેચાવાનું શરૂ કર્યું છે. તેમના આ કામમાં સ્કૂલ તરફથી પણ સારો એવો સહકાર મળી રહ્યો છે. જે બાદ હાલમાં તેઓ રોજનું 15-20 કિલો ફરસાણ વેચવામાં સફળ રહ્યા છે.

Iamgujarat.com સાથે વાત કરતા શિક્ષિકા વનીતા બેને જણાવ્યું કે, લોકડાઉનમાં કારખાના બંધ થઈ ગયા, અમારા પતિને પણ નોકરીમાં પૂરો પગાર નથી મળી રહ્યો. અમને સ્કૂલ તરફથી પૂરો પગાર ચૂકવાય છે, પરંતુ એક પગારમાં ઘરનું પૂરૂં થાય તેમ નથી. ઉપરાંત છોકરાઓના અભ્યાસમાં પુસ્તકોનો ખર્ચો, ઓનલાઈન ક્લાસ માટે ડેટા પેકનું રિચાર્જ, ઘર ખર્ચ અને અન્ય આકસ્મિક ખર્ચાઓ વધી રહ્યા છે. અમારા બે શિક્ષિકા બહેનોમાંથી એકના પતિની નોકરી છૂટી ગઈ, જ્યારે અન્યના પતિ કેન્સર સામે લડી રહ્યા છે. એવામાં અમે બધાએ વિચાર્યું કે આપણને પૈસાની જરૂર છે અને ફરસાણનું કામ આવડે છે તો આ કામ કરીએ. ઘર માટે બનાવાતા આ ફરસાણનું તહેવારમાં વેચાણ પણ થઈ જાય.'

વનીતા બહેન આગળ કહે છે, આ કામ માટે અમે સ્કૂલના પ્રિન્સિપાલ અને ટ્રસ્ટી સાથે પણ વાત કરી. અમારી વાત સાંભળીને સ્કૂલના ટ્રસ્ટીએ સામેથી કહ્યું કે અત્યારે સ્કૂલ ખાલી જ છે અને તેમણે સ્કૂલનું રસોડું અને 3 ક્લાકરૂમ વાપરવા માટે આપ્યા. આ બાદ સ્કૂલના વાસણો ગેસના બાટલા પણ સામેથી જ વાપરવા માટે અમને આપ્યા. સ્કૂલે અમને આટલી બધી મદદ કરી એટલે અમે નામ પણ તેના પરથી જ રાખ્યું.

વનીતા બહેને કહ્યું- ફરસાણ બનાવવા માટે કાચો માલ ગમે ત્યાં લેવા જાવ પૈસા આપવા પડે. આથી અમે ટ્રસ્ટી સમક્ષ થોડી લોનની માગણી મૂકી. જોકે તેમણે અમને સામેથી અમુક પૈસા આપ્યા અને ખરીદી કરીને રક્ષાબંધનના મૂહુર્તમાં જ ફરસાણનું કામ શરૂ કરવા કહ્યું અને આ પૈસા પાછા આપવાની પણ ઉતાવળ ન કરતા તમને જ્યારે લાગે કે હવે પૈસાનું સુખ થયું છે ત્યારે પાછા આપજો. વનીતા બહેન કહે છે, સ્કૂલના ટ્રસ્ટી અને પ્રિન્સિપાલે અમને આ કામમાં ખૂબ જ સપોર્ટ આપ્યો છે. અને આગળ પણ કોઈપણ મુશ્કેલી આવે તો મદદ કરવાની તૈયારી દર્શાવી છે. હાલમાં અમારે રોજનું 15-20 કિલો ફરસાણનું વેચાણ થઈ રહ્યું છે.