તોડફોડના 13 વર્ષ જૂના કેસમાં ભાજપના ધારાસભ્ય રાઘવજી પટેલ દોષીત જાહેર

એક તરફ વિધાનસભાની પેટા ચૂંટણીઓ આવી રહી તે પહેલા જ ભાજપના ધારાસભ્ય રાઘવજી પટેલની મુશ્કેલીમાં વધારો થયો છે. 13 વર્ષ જુના ધ્રોલની હોસ્પિટલમાં તોડફોડ કેસમાં કોર્ટે રાઘવજી પટેલને દોષીત ઠેરવ્યા છે. ધ્રોલ કોર્ટે ધારાસભ્ય સહિત પાંચ લોકોને દોષિત ઠેરવ્યા છે. આ કેસમાં ત્રણથી માંડીને વધુમાં વધુ પાંચ વર્ષની સજાની જોગવાઈ છે.

વર્ષ 2007માં તત્કાલિન કોંગ્રેસી ધારાસભ્ય રાઘવજીભાઇ પટેલની આગેવાની હેઠળ ધ્રોલની સરકારી હોસ્પિટલમાં સુવિધા મામલે રેલી યોજી આવેદનપત્ર પાઠવવા દરમ્યાન હોસ્પિટલ સંકુલમાં તોડ-ફોડ કરવામાં આવી હતી. જેમાં ધ્રોલ ખાતે તત્કાલિન કોંગ્રેસી ધારાસભ્ય અને હાલમાં જામનગરના ધારાસભ્ય રાઘવજીભાઇ પટેલ અને તેમના ટેકેદારો સહિતના લોકો સામે પબ્લીક પ્રોપર્ટી ડેમેજીસ એક્ટની કલમો મુજબ ગુનો નોંધાયો હતો.

દરમ્યાન આજે આ કેસની સુનાવણી હાથ ધરવામાં આવી હતી. જેમાં ધ્રોલ કોર્ટે ધારાસભ્ય રાઘવજી પટેલ સહિત પાંચ લોકોને આ કેસમાં દોષિત ઠેરવ્યા છે. જ્યારે અન્ય ત્રણ આરોપીઓને નિર્દોષ જાહેર કરાયા છે. ધારાસભ્ય રાઘવજી પટેલ સહિત પાંચ દોષિતોને અપીલમાં જવા માટે કોર્ટ દ્વારા એક મહિના માટે જામીન મુક્ત કરવામાં આવ્યા છે.