રાજકોટનો ગરીબ ઉલમાંથી ચૂલમાં પડ્યો.. થેલેસેમિયા હતો અને HIV પોઝિટિવ આવ્યો

રાજકોટઃ રાજકોટમાં સિવિલ હોસ્પિટલમાં બેદરકારીનો કિસ્સો સામે આવ્યો છે. જેમાં થેલેસેમિક બાળકને લોહી ચઢાવ્યા બાદ તેનો રિપોર્ટ કરવામાં આવ્યો તો તે HIV પોઝિટિવ આવ્યો છે. જેના કારણે ગરબીને ડબલ માર પડ્યો છે. આ મામલે સિવિલના જવાબદારો સામે કાયદેસરની કાર્યવાહી કરવાની માગણી કરવામાં આવી છે. આ સાથે મજૂરી કામ કરીને ગુજરાન ચલાવતા ગરીબના બાળકને થેલેસેમિયાની સાથે HIV થતાં કોંગ્રેસે સાથ આપીને આ અંગે કલેક્ટરને રજૂઆત કરી છે અને બેદરકારી દાખવનારા તબીબો સામે કાર્યવાહી કરવામાં આવે તેવી માગણી કરવામાં આવી છે.

બાળકના પિતા કડિયાકામ કરે છે, અને આ તેમનો એકનો એક દીકરો છે. બાળકને થેલેસેમિયા હોવાથી તેને દર 15 દિવસે લોહી ચઢાવવું પડતું હતું પરંતુ હવે તેનો HIV રિપોર્ટ પોઝિટિવ આવતા કોઈ HIV પોઝિટિવ દર્દીનું લોહી ચઢાવી દીધું હોય તેવાની શંકા વ્યક્ત કરવામાં આવી રહી છે. શું લોહી તપાસ કર્યા વગર જ ચઢાવી દીધું હતું. આ બેદરકારી પાછળ કોણ જવાબદાર છે તે હજુ સામે આવ્યું નથી.

સિવિલે પોતાની ભૂલ ના હોવાનું કહ્યું

એક તરફ ગરીબ બાળકને ઉલમાંથી ચૂલમાં પાડવાનો વારો આવ્યો છે ત્યારે સિવિલ હોસ્પિટલે પોતાનો બચાવ કર્યો છે. બાળકને સુરક્ષિત લોહી ચઢાવવામાં આવ્યું હોવાનું જણાવવામાં આવી રહ્યું છે. બ્લડ બેંકના ગૌરવી ધુરવે જણાવે છે કે, લેટેસ્ટ ફોર્થ જનરેશન કિટથી રક્તદાતાના લોહીની તપાસ કરવામાં આવે છે, જેમાં HBsAg (હિપેટાઈટિસ બી સરફેસ એન્ટિજન), HIV, VDRL અને હિપેટાઈટિસ Cના રિપોર્ટ સામાન્ય આવ્યા બાદ જ લોહી અપાતું હોય છે. આ અંગે ઉપરથી આદેશ આવ્યા બાદ કાર્યવાહી કરવામાં આવશે તેમ પણ તેમણે જણાવ્યું છે.

આ મામલે કોંગ્રેસની કાર્યવાહીની માગણી

કોંગ્રેસના નેતા બાળકના વાલીને લઈને કલેક્ટર કચેરી પહોંચ્યા હતા અને કેસ અંગેની રજૂઆત કરવામાં આવી છે. આ પ્રકારના કિસ્સામાં લેટેસ્ટ ટેક્નોલોજીનો ઉપયોગ થવો જોઈએ તેવી રજૂઆત તેમના દ્વારા કરાઈ છે. બાળકના વાલી દ્વારા આક્ષેપ કરવામાં આવ્યો છે સિવિલના તબીબોની બેદરકારીના કારણે તેમના દીકરાને થેલેસેમિયાની સાથે HIVનો ચેપ લાગી ગયો.