રાજકોટઃ ઘરમાંથી ચોરાયેલા દાગીનાની ફરિયાદ નોંધાવતા દીકરીનું 1 વર્ષ જૂનું લફરું સામે આવ્યું

રાજકોટમાં ઘરમાંથી ચોરી થયેલા દાગીનાની તપાસમાં દીકરાના પ્રેમ પ્રકરણનો ભાંડો ફૂટવાની ચોંકાવનારી ઘટના સામે આવી છે. જેમાં ઘરમાં એકલી પ્રેમિકાને મળવા માટે ગયેલો પ્રેમી કિંમતી દાગીના પર હાથ સાફ કરી ગયો હતો. આ મામલે પોલીસમાં ફરિયાદ નોંધાતા પ્રેમી જ ચોર નીકળ્યો હતો અને તેણે આર્થિકભીંસમાં હોવાના કારણે આ ચોરી કરી હોવાનું કબૂલ્યું હતું.

સ્થાનિક ન્યૂઝ રિપોર્ટ્સ મુજબ, રાજકોટના રેલ નગર મેઇન રોડ પર આવેલા એપાર્ટમેન્ટમાં બન્યો હતો. અહીં રહેતા જાગૃતિબેન નામના બ્યુટીશિયને પોતાના ફ્લેટમાં ચોરી થયાની ફરિયાદ નોંધાવી હતી. જોકે પોલીસની તપાસમાં દીકરીનો પ્રેમી જ ચોર હોવાનું સામે આવ્યું હતું. ત્યારે પોલીસે આરોપી પ્રેમીની ધરપકડને પૂછપરછ કરતા તેણે આર્થિકભીંસ દૂર કરવા અને મોજ મજા કરવા માટે દાગીના ભરેલું પર્સ સેરવી લીધાની કબૂલાત આપી હતી.

રિપોર્ટ્સ મુજબ, જાગૃતિબેને પિતાની તબિયત નાદુરસ્ત હોવાને કારણે 17મી જાન્યુઆરીએ રોજ અમદાવાદ ગયા હતા. આ સમયે ઘરે દીકરી ઘરમાં એકલી હતી અને 24મીના રોજ પિતાનું મૃત્યુ નીપજતા પુત્રીએ પ્રસંગમાં જવાનું રદ કર્યું હોઈ તે ઘરમાં એકલી હતી, જ્યારે પરિવારજનો અમદાવાદમાં હતા. આ બાદમાં 30મી જાન્યુઆરીના રોજ જાગૃતિબેને કબાટની અંદર પાકીટમાં રાખેલા દાગીના શોધવાનો પ્રયાસ કરતા તે મળ્યા નહોતા.

આ વિશે તેમણે દીકરીને પણ પૂછ્યું પરંતુ ઘણી શોધખોળ બાદ પણ પાકીટ ન મળતા આખરે જાગૃતિબેને સોના-ચાંદીના ઘરેણાં ભરેલા પાકીટ ચોરીની ફરિયાદ નોંધાવી હતી. પોલીસે આ મામલે આકરી પૂછપરછ કરતાં દીકરીએ વિજયરાજસિંહ નામના યુવક સાથે 1 વર્ષથી પ્રેમસંબંધ હોવાની અને પરિવારજનોની ગેરહાજરીમાં પ્રેમી ઘરમાં મળવા આવ્યો હોવાની વાત કરી હતી. પોલીસે બાદમાં પ્રેમીની પૂછપરછ કરતાં તેણે આર્થિકભીંસ દૂર કરવા પ્રેમિકાને મળવા જતા તેની નજર ચૂકવીને દાગીના ભરેલું પર્સ તફડાવી લીધું હોવાનું કબૂલ્યું હતું.