'મને વિજય રુપાણીથી જીવનો ખતરો છે, સુરક્ષા અપાવો'

I am Gujarat

CM રુપાણી પર લગાવ્યો આરોપ

અમદાવાદ: રાજકોટના કૌશિક વ્યાસ દ્વારા પોલીસ સુરક્ષા મેળવવા માટે સુપ્રીમ કોર્ટના બારણા ખખડાવ્યા છે. આ શખસે પોતાને અને પોતાના પરિવારને રાજ્યના CM વિજય રુપાણી વતી કેટલાક ગુંડાતત્વો દ્વારા ધાક-ધમકી અપાતી હોવાનો આરોપ મૂક્યો છે. જેથી તેમણે સુપ્રીમ કોર્ટમાં શહેર પોલીસ કમિશનરને યોગ્ય સુરક્ષા પૂરી પાડવા માટે નિર્દેશ આપવા અરજી કરી છે.

શું કહે છે ફરિયાદી?

કૌશિક વ્યાસે પોતાની આ અરજીમાં ઉલ્લેખ કર્યો છે કે તેમણે શહેર પોલીસ કમિશનરને આ અંગે ફરિયાદ કરી હતી પરંતુ કોઈ જ પગલા લેવાયા નહોતા. વ્યાસે આરોપ લગાવ્યો હતો કે, CM રુપાણીએ તેઓ વિવાદાસ્પદ નેપાળી પરિવારની આત્મહત્યાના કેસમાં તપાસ ચાલુ ન રાખી શકે તેમાટે સરકારી તંત્રને તેમની પાછળ લગાવી દીધા છે. કૌશિક વ્યાસે દાવો કર્યો છે કે વિજય રુપાણીએ BJPના બે કાઉન્સીલર અને શ્રી છોટુ નગર હાઉસિંગ સોસાયટી લિમિટેડના ઓફિસ બેરરને મૂકસંમતિ આપીને ત્યાં રહેતી એક નેપાળી ફેમિલીને સ્થાળાંતરિત કરાવાનો પ્રયત્ન કર્યો હતો. આ ફેમિલીને બદલામાં નાની-અમથી જગ્યા ફાળવવામાં આવી હતી. મ્યુનિસિપલ કોર્પોરેશન દ્વારા ઘર ખાલી કરાવડાવવાની નોટિસ આ ફેમિલીને આપી દેવાઈ. જેથી આ કુટુંબના 5 લોકોએ વર્ષ 2013માં આપઘાત કરી લીધો હતો.

CM રુપાણીની મુશ્કેલી વધશે?

વ્યાસે દાવો કર્યો કે તેઓ કેસને ન્યાયના હિતમાં અનુસરી રહ્યા હોવાને કારણે CM રુપાણી દ્વારા ભાડાના ગુંડાતત્વો દ્વારા તેમને અને તેમના પરિવારને ધમકરીઓ મળી રહી છે. આ ગુંડાતત્વોએ ધમકી આપી હતી કે ચૂંટણી પૂરી થતા જ તેમને અને તેમના પરિવારના લોકોને ખતમ કરી દેવાશે. તેમણે દાવો કર્યો હતો કે પોલીસ કમિશનર સમક્ષની તેમની ફરિયાદ અને પોલીસ સુરક્ષા અંગેની તેમની અરજી બન્ને અંગે કોઈ કાર્યવાહી ન થતા કોર્ટે રાજકોટ શહેર પોલીસ કમિશનરને જરુરી પગલા ભરવા નિર્દેશ આપવા જોઈએ.