Morbi Bridge Collapse Tragedy: ચાર જણના પરિવાર માટે પિકનિક 'કાળ' બની ગઈ

Morbi Bridge Collapse Tragedy: નવા વર્ષના તહેવારો પૂરા થવાના હતા ત્યારે જવેલર ભાવેશ ભીંડીએ (40) તેમના પરિવાર સાથે ઝૂલતા પુલ તરફ જવાનું નક્કી કર્યું. તેમના પરિવારમાં પત્ની મીતા (35) અને બે બાળકો ધ્રુવી (14) અને નિસર્ગ (11)નો સમાવેશ થાય છે. પરિવારના નજીકના સંબંધીઓ મોરબીમાં રહેતા નથી પરંતુ દૂરના પિતરાઈ ભાઈ અશોક ભીંડીને અન્ય શહેરમાં રહેતા તેમના ભાઈનો ફોન આવ્યો કે પરિવારના તમામ સભ્યોના મોબાઈલ ફોન બંધ છે. અશોકે જણાવ્યું કે, “મને ખબર નહોતી કે ભાવેશ તેના પરિવાર સાથે પુલ પર ગયો છે.'

હોસ્પિટલમાં પહોંચતા મૃતકોની લિસ્ટમાં તેમનું નામ...
અશોકે જણાવ્યું કે, આ ઘટનાના સમાચાર વાયરલ થયા બાદ તેમના ભાઈએ મારો સંપર્ક કર્યો અને તેમના તમામ ફોન સ્વીચ ઓફ આવતા હતા. હું તેમના ઘરે ગયો અને પડોશીઓ પાસેથી જાણવા મળ્યું કે પરિવાર પુલ પર ગયો છે. હું હોસ્પિટલ પહોંચ્યો અને મૃત લોકોની યાદીમાં તેમના નામ જોવા મળ્યા.

4 સભ્યોના પરિવાર માટે પિકનિક બની ગઈ કાળ
આ પરિવાર દરબારગઢ વિસ્તારમાં રહેતો હતો અને બાળકોને કારણે પુલ પર ગયો હતો. પરિવારના સંબંધી જગદીશ સોનીએ કહ્યું: “આખો પરિવાર ગયો છે. તેઓ ફક્ત દિવાળીની રજાઓનો આનંદ માણવા માંગતા હતા, પરંતુ આ નાનકડી પિકનિક તેમના માટે કાળ બની ગઈ. ચારેયના મોત થતાં સગા સંબંધીઓમાં શોકનો માહોલ છે. મોરબી હોનારતમાં ભીંડી પરિવારની જેમ જ અનેક પરિવારોના બાળકો-મહિલાઓ-વૃદ્ધો મોતને ભેટ્યા છે.

રવિવારે સર્જાઈ હતી હોનારાતઉલ્લેખનીય છે કે, 30 ઓક્ટોબરની સાંજે મોરબી શહેરમાં મચ્છુ નદી પર આવેલો ઝૂલતો પુલ એકાએક તૂટી પડતા સેંકડો લોકો પાણીમાં ગરકાવ થયા હતા. આ હોનારતમાં અત્યાર સુધી 135 લોકોના મોતની પુષ્ટિ થઈ છે. જો કે, બિન સત્તાવાર આંકડો એના કરતા વધારો હોવાનું જાણવા મળી રહ્યું છે. ઘટનાને લઈને ગુજરાત અને દેશ જ નહીં પરંતુ વિશ્વભરમાં શોકનો માહોલ છે.