દેવભૂમિ દ્વારકાના ભાણવડ તાલુકામાં બે કલાકમાં 5 ઈંચથી વધુ વરસાદ

દ્વારકાઃ સૌરાષ્ટ્રમાં મેઘરાજાની બીજી ઈનિંગ પણ ધમાકેદાર રહી છે. ગીર સોમનાથ, દ્વારકા, જુનાગઢ, અમરેલી, સહિત સમગ્ર પંથકમાં ચિક્કાર મેઘમહેર થઈ છે. ભારે વરસાદથી તમામ રોડ રસ્તાઓ પર પાણી જ પાણી જોવા મળી રહ્યું છે તો ગ્રામ્ય વિસ્તારની નદીઓમાં ઘોડાપૂર પણ આવ્યા છે. દેવભૂમિ દ્વારકાના ભાણવડ તાલુકામાં પણ બે કલાકમાં 5 ઈંચથી વધુ વરસાદ ખાબક્યો હતો. હવામાન વિભાગની આગાહી અનુસાર હજું પણ 5 ઓગસ્ટથી અતિભારે વરસાદ થાય તેવી શક્યતા છે.

બે કાંઠે વહેતી થઈ નદીઓ
ભાણવડની ફૂલકું નદી પણ બે કાંઠે વહેતી થઈ છે. ભારે વરસાદના પગલે ભાણવડ પંથકના ખેડૂતોને પાકને નુકસાન થવાની ભીતિ પણ સતાવી રહી છે. ઉપરાંત ભાણવડ તાલુકાના વેરાળી નંબર 2 ડેમમાં પણ નવા નીરની આવક થઈ છે.

ગીર સોમનાથમાં સૌથી વધુ મેઘમહેર
સમગ્ર સૌરાષ્ટ્રમાં વરસાદે માઝા મૂકી હતી તો ગીર સોમનાથમાં સૌથી વધુ મેઘમહેર રહી હતી. જિલ્લાની ગ્રામ્ય વિસ્તારોમાં નદીઓમાં ઘોડાપૂર આવ્યાં હતાં તો તાલાળાના માધુપુર ગામ નજીક આવેલી સરસ્વતી નદીમાં પણ ધસમસતા નીર આવ્યાં છે. ગીરમાં પણ અનરાધાર વરસાદ ખાબકતા ભોજદે પાસેની કપુરિયા નદીમાં ઘોડાપૂર આવ્યું હતું. આ ઉપરાંત તાલાળાથી વેરાવળ જતા રસ્તામાં પણ કાર ડૂબી જાય તેટલા પાણી ભરાઈ જતાં વાહનચાલકોને પણ ખૂબ જ મુશ્કેલી પડી હતી. આ ઉપરાંત જુનાગઢના ગિરનારમાં પણ ધોધમાર વરસાદ ખાબક્યો હતો. જેના કારણે નયનરમ્ય દ્રશ્ય જોવા મળ્યું હતું.

જોઈ લો ગિરનારનો વિડીયો