હવે રાજ્યના આ બે શહેરોમાં દિવસે યોજાતા લગ્ન માટે નહીં લેવી પડે પોલીસની મંજૂરી

અમદાવાદ: રાજ્યમાં વધતા કોરોનાના સંક્રમણને પગલે અમદાવાદ, રાજકોટ, સુરત અને વડોદરામાં રાત્રિ કર્ફ્યૂ મૂકવામાં આવ્યો છે. જે મુજબ, રાત્રે 9 વાગ્યાથી સવારે 6 વાગ્યા સુધી આ કર્ફ્યૂ અમલમાં રહેશે. તે સાથે જ લગ્નો માટે પણ પોલીસની મંજૂરી લેવાનું ફરજિયાત કરવામાં આવ્યું હતું. જોકે, હવે રાજકોટ અને વડોદરામાં દિવસના લગ્નોને લઈને મહત્વનો નિર્ણય લેવાયો છે.

રાજકોટ અને વડોદરા બંને શહેરોમાં હવે દિવસના લગ્નો માટે પોલીસની મંજૂરી નહીં લેવી પડે. જોકે, રાત્રે 9 વાગ્યા પહેલા લગ્નમાં સામેલ લોકોએ ઘરે પહોંચવું પડશે. આ નિર્ણયથી જેમના ઘરે લગ્ન પ્રસંગ છે તેમને ઘણી મોટી રાહત મળશે. જોકે, જેમને ત્યાં રાત્રે લગ્ન લેવાયા છે, તેમના માટે સમસ્યા રહેશે.

ઉલ્લેખનીય છે કે, દિવસભર લગ્નોના આયોજનોની મંજૂરી માટે લોકોની લાંબી લાઈનો લાગતી હતી. તેના પગલે આ બે શહેરોની પોલીસે દિવસના લગ્ન માટે મંજૂરી નહીં લેવી પડે તેવો નિર્ણય લીધો છે. રાજકોટ પોલીસના જણાવ્યા મુજબ, સમય અંગે પોલીસ કેટરર્સ અને રસોઈયાની પૂછપરછ કરશે.

વડોદરા શહેર પોલીસ કમિશનરની એક યાદીમાં જણાવાયું છે કે, વડોદરા શહેર પોલીસ કમિશનરેટ હદ વિસ્તારમાં સવારે 6થી રાત્રિના 8 વાગ્યા સુધી કન્ટેનમેન્ટ ઝોન સિવાયના વિસ્તારોમાં ખુલ્લાં સ્થળો/બંધ સ્થળોએ, સ્થળની ક્ષમતાના 50%થી વધુ નહીં, પરંતુ મહત્તમ 100 વ્યક્તિઓની મર્યાદામાં લગ્ન/સત્કાર સમારંભના આયોજન માટે કોઈ પરવાનગી લેવાની રહેશે નહીં. રાત્રે કર્ફ્યૂ દરમિયાન કોઈપણ લગ્ન/સત્કાર સમારંભ યોજી શકાશે નહીં.

ઉલ્લેખનીય છે કે, અગાઉ લગ્નપ્રસંગમાં 200 વ્યક્તિને મંજૂરી હતી. પરંતુ સરકારે તેને ઘટાડીને 100 કરી દીધી છે. સાથે જ લગ્નપ્રસંગ માટે પોલીસની મંજૂરી લેવાનો પણ આદેશ આપ્યો હતો. જેના પગલે જેમના ઘરે લગ્ન લેવાયા છે, તેઓએ સ્થાનિક પોલીસ સ્ટેશનમાં કંકોત્રી લઈને મંજૂરી માટે જવું પડી રહ્યું છે. જોકે, રાજકોટ અને વડોદરાના લોકોને તો આ પરેશાનીમાંથી મુક્તિ મળી છે, પણ અમદાવાદ અને સુરતમાં હજુ આવી કોઈ છૂટ અપાઈ નથી, જેથી અહીં જેમના ઘરે લગ્નપ્રસંગ હશે તેમણે પોલીસની મંજૂરી લેવાની રહેશે.