સી-પ્લેન બાદ PM મોદી આ સુવિધાનો કરાવશે શુભારંભ, સૌરાષ્ટ્રવાસીઓને મળશે દિવાળીની ભેટ

ભાવનગર/સુરત: વડાપ્રધાન નરેન્દ્ર મોદી સી-પ્લેન બાદ હવે સુરતના હજીરા બંદરેથી ભાવનગરના ઘોઘા બંદર માટે રો-પેક્સ ફેરી સેવાનો શુભારંભ કરાવશે. પીએમ મોદી 8 નવેમ્બરના રોજ નવનિર્મિત રોરો ટર્મિનલનું વર્ચ્યુઅલ લોકાર્પણ કરીને સુરતમાં વસતા સૌરાષ્ટ્રવાસીઓ સહિત દક્ષિણ ગુજરાત લોકોને દિવાળીની ભેટ આપશે. જણાવી દઇએ કે હજીરા-ઘોઘા રો પેક્સ ફેરીનું 31મી ઓક્ટોબરના રોજ લોકાર્પણ થવાનું હતું પરંતુ ગુજરાત મેરિટાઈમ બોર્ડ અને ઇન્ડીગો સીવેઝ વચ્ચે કરારની બાબતે મડાગાંઠ સર્જાતા હજીરાથી લોકાર્પણ મોકૂફ રાખવું પડ્યુ હતું.

10-12 કલાક લેતી મુસાફરી 4 કલાકમાં થશે પૂર્ણ
કેન્દ્રીય શીપિંગ રાજ્યમંત્રી મનસુખ માંડવીયાએ જણાવ્યું હતું કે, વર્ષોથી સુરતમાં વસતા સૌરાષ્ટ્રના અંદાજે 20 લાખ લોકો માટે રો-પેક્સ ફેરી સેવા વડાપ્રધાન તરફથી દિવાળીની ભેટ સાબિત થશે. રો પેક્સ ફેરી વિશે જણાવતા તેઓએ કહ્યું હતું કે, સુરતથી સૌરાષ્ટ્ર જવા માટે 10થી 12 કલાકની માર્ગ મુસાફરી કરવી પડે છે. રો-પેક્સ ફેરી શરુ થયા બાદ મુસાફરી માત્ર 4 કલાકની થઈ જશે. એટલું જ નહીં, લોકો તેમની બાઈક અને કાર પણ વતનમાં લઈ જઈ શકશે.

રો-પેક્સ ફેરી સર્વિસ દિવસમાં 3 રાઉન્ડ ટ્રીપ કરશે
મનસુખ માંડવીયાએ વધુમાં જણાવ્યું કે, દક્ષિણ ગુજરાતના લોકો માટે રો-પેક્સ ફેરી સર્વિસ સૌરાષ્ટ્રના દ્વાર ખોલી દેશે. તેમના માટે સોમનાથ મંદિર, સાસણગીર, ગિરનાર, દ્વારકા, શૈત્રુંજ્ય, જામનગરના ઈકો ટુરિઝમ કે રાજકોટના વેપારી મથકો સુધી પહોંચવું સુગમ બનશે. રો-પેક્સ સર્વિસ દિવસમાં ત્રણ રાઉન્ડ ટ્રીપ કરશે, જે મુજબ એક વર્ષમાં અંદાજે 5 લાખ મુસાફરો, 80 હજાર વાહનો, 50 હજાર ટુ-વ્હીલર અને 30 હજાર ટ્રકની અવરજવર શક્ય બનશે. ઘોઘા-હજીરા વચ્ચેનું માર્ગ અંતર લગભગ 370 કિમીનું છે જે ફેરી સર્વિસ શરૂ થયા બાદ ઘટીને 97 કિમીનું થઈ જશે.

31 ઓક્ટોબરના રોજ થવાનું હતું લોકાર્પણ
ઘોઘા-હજીરા રો-પેક્સ ફેરી સર્વિસ 31મી ઓક્ટોબરથી ચલાવવાની હતી, પરંતુ ગુજરાત મેરિટાઇમ બોર્ડ (જીએમબી) અને ઇન્ડીગો સીવેઝ વચ્ચે કરારની બાબતે મડાગાંઠ સર્જાતા હજીરાથી લોકાર્પણ મોકૂફ રાખવું પડ્યુ હતું. મળતી માહિતી પ્રમાણે GMB અને ફેરી ઓપરેટર વચ્ચે સપ્લીમેન્ટરી શામેલ કરવામાં આવેલી વાંધાજનક શરતોને કારણે બંને વચ્ચે મતભેદો સર્જાયા હતા. જો કે, બંને વચ્ચે સમાધાન થયા બાદ હવે સર્વિસ શરૂ કરવાની યોજનાને આખરી ઓપ અપાઈ રહ્યો છે.