રાજકોટ: માસ્ક પહેર્યા વિના 10થી વધુ વાર કેમેરામાં પકડાયા તો પોલીસ ઘરે આવશે

રાજકોટ: કોરોનાનો પ્રસાર અટકાવવા માટે ગુજરાત સરકારે માસ્ક ફરજિયાત બનાવ્યું છે, અને તેને પહેર્યા વિના કોઈ બહાર નીકળે તો તેને એક હજાર રુપિયા દંડ કરવામાં આવે છે. વળી, શહેરોમાં ટ્રાફિક સિગ્નલ પર લાગેલા કેમેરામાં પણ કોઈ વાહનચાલક માસ્ક પહેર્યા વગરનો દેખાય તો તેના ઘરે ઈ-મેમો મોકલવામાં આવે છે. જોકે, ઘણા લોકો ઈ-મેમોને તો ગાંઠતા જ નથી. રાજકોટના લોકો પણ તેમાં પાછળ નથી. પરંતુ હવે શહેરના પોલીસ કમિશનર મનોજ અગ્રવાલે ચેતવણી આપતા જણાવ્યું છે કે જો કોઈ એક વાહન પર માસ્કના મામલે 10થી વધુ ઈ-મેમો જનરેટ થયા તો પોલીસ વાહન માલિકના ઘરે પહોંચશે.

રાજકોટમાં રોજેરોજ ટ્રાફિકના નિયમોનો ભંગ કરતા કે પછી માસ્ક વિના ફરતા વાહનચાલકોને મેમો ઘરે મોકલવામાં આવે છે. પોલીસ કમિશનરે આજે જણાવ્યું હતું કે, ઘણા વાહનોને માસ્ક મામલે એકથી વધુ ઈ-મેમો જનરેટ થયા છે. તેવામાં પોલીસે હવે નક્કી કર્યું છે કે જે કિસ્સામાં દસથી વધુ ઈ-મેમો જનરેટ થયા હોય તેવા વાહનમાલિકોને હવે પોલીસ શોધી કાઢશે અને તેમની સામે દંડ વસૂલ કરવાથી લઈને બીજી પણ કડક કાયદાકીય કાર્યવાહી હાથ ધરવામાં આવશે.

ઘણા કિસ્સામાં વાહનનું એડ્રેસ ખોટું હોય છે, તેવામાં રાજકોટ શહેરમાં લાગેલા AMR કેમેરાથી વ્યક્તિના ચહેરાના આધારે તેને શોધી કાઢવામાં આવશે, અને તેમની વિરુદ્ધ કાર્યવાહી કરવામાં આવશે. મહત્વનું છે કે, હાલ ગુજરાતમાં કોરોના માંડ ફરી કાબૂમાં આવ્યો છે. રાજ્યમાં હવે રોજના એક હજારથી પણ ઓછા કેસ સામે આવી રહ્યા છે, અને રાજકોટમાં પણ સ્થિતિ મહદ અંશે કાબૂમાં આવી ગઈ છે. જોકે, કોરોનાનો ખતરો હજુય ટળ્યો નથી, તેવામાં લોકો માસ્ક ફરજિયાતપણે પહેરે તે ખૂબ જ જરુરી છે.

થોડા દિવસો પહેલા જ ગુજરાત હાઈકોર્ટે માસ્ક વિના ફરતા લોકો પાસેથી કોવિડ સેન્ટર્સમાં ફરજિયાતપણે સમાજ સેવા કરાવવામાં આવે તેવો ગુજરાત સરકારને આદેશ આપ્યો હતો. જોકે, આમ કરવું શક્ય ના હોવાની દલીલ સાથે ગુજરાત સરકારે હાઈકોર્ટના નિર્ણય સામે સુપ્રીમ કોર્ટમાં અપીલ કરીને તેના પર સ્ટે મેળવ્યો હતો. હાલ રાજ્યમાં માસ્ક પહેર્યા વિના કોઈ પકડાય તો તેની પાસેથી એક હજાર રુપિયાનો દંડ વસૂલવામાં આવે છે.