1000 ડી-ડાઈમર, 657 શુગર છતાંય ડૉક્ટરોએ 27 દિવસની આ બાળકીને બચાવી લીધી

રાજકોટ: 27 દિવસની એક નાનકડી બાળકીએ ગજબની ફાઈટ આપીને કોરોનાને હરાવ્યો છે. ચોંકાવનારી વાત એ છે કે આ છોકરીને કિડની કોમ્પ્લિકેશન્સ હતા, તેનું ડી-ડાયમર લેવલ હાઈ હતું, અને તેનું શુગર લેવલ પણ વધીને 657 પર પહોંચી ગયું હતું. 10મી મેના રોજ સુરેન્દ્રનગરની સિવિલ હોસ્પિટલમાં જન્મેલી 'લક્ષ્મી' જન્મી ત્યારથી જ એક ફાઈટરની જેમ એક પછી એક પડકારો સામે લડી રહી છે.

ડૉક્ટર્સના જણાવ્યા અનુસાર, લક્ષ્મી જન્મી ત્યારે તે રડી નહોતી. એસ્ફેક્શિયા તરીકે ઓળખાતી આ સ્થિતિ એ વાતનો નિર્દેશ કરતી હતી કે લક્ષ્મીને પૂરતો ઓક્સિજન નથી મળ્યો. જો બાળક જન્મતી વખતે રડે નહીં તો તેના મગજમાં સોજો ચઢવાની શક્યતા વધી જાય છે. હોસ્પિટલમાં જ તેની ટ્રીટમેન્ટ કરવામાં આવી હતી, જોકે સાજી થઈને ઘરે ગયાના થોડા જ સમયમાં લક્ષ્મીને ફરી એડમિટ કરવી પડી હતી. કારણકે, તેને તાવ આવતો હતો, યુરિન પાસ કરવામાં સમસ્યા થઈ રહી હતી અને શરીર પર સોજા આવી ગયા હતા.


કિડનીમાં સોજો હોવાના કારણે લક્ષ્મીને 18મી મેના રોજ ગંભીર હાલતમાં રાજકોટ સિવિલમાં રીફર કરાઈ હતી. તેને શ્વાસ લેવામાં સતત તકલીફ પડતી હોવાના કારણે તેનો કોરોના ટેસ્ટ કરાયો હતો, જે પોઝિટિવ આવ્યો હતો. બાળકીનું ડી-ડાઈમર લેવલ 1,000ને ક્રોસ કરી ગયું હતું અને શુગર લેવલ પણ 657 પર પહોંચ્યું હતું. જેના કારણે ડૉક્ટરોએ તેને ઓક્સિજનનો સપ્લાય વધાર્યો હતો.


લક્ષ્મીની સારવાર કરનારા રાજકોટ સિવિલના પિડિયાટ્રિશિયન ડૉ. ચેતન ભળગામિયાએ ટાઈમ્સ ઓફ ઈન્ડિયા સાથે વાત કરતાં જણાવ્યું હતું કે બાળકીની કિડનીના સોજાને ઓછા કરવા મોટો પડકાર હતો. ઈન્ફેક્શનને કારણે તે પૂરતા પ્રમાણમાં બ્રેસ્ટ ફિડિંગ પણ નહોતી કરી શકતી. નવાઈની વાત એ હતી કે તેના માતા-પિતા તો ઠીક, પરંતુ તેના આખા પરિવારમાં કોઈને કોરોના નહોતો તેવામાં લક્ષ્મીને ક્યાંથી તેનો ચેપ લાગી ગયો તે એક સવાલ હતો.

કોરોનામાંથી સાજા થયા બાદ કેટલો સમય લોહી પાતળું કરવાની દવા લેવી જરુરી?

લક્ષ્મી તેના માતાપિતા અશોક અને કાજલનું પહેલું સંતાન છે, જેઓ ધ્રાંગધ્રા તાલુકાના રાજગઢ ગામમાં ખેતમજૂર તરીકે કામ કરે છે. રાજકોટ સિવિલમાં અત્યારસુધી 191 કોવિડ પોઝિટિવ બાળકોની સારવાર કરાઈ છે, જેમાં સૌથી મુશ્કેલ કેસ લક્ષ્મીનો હતો. થોડા દિવસની ટ્રીટમેન્ટ બાદ તેના બ્લડ શુગર કંટ્રોલમાં લેવા ઈન્શ્યૂલીન આપવાનું શરુ કરાયું હતું. લાંબી સારવાર બાદ આખરે બાળકીની કિડની પર ચઢેલા સોજા ઉતર્યા હતા, અને તે કોઈ તકલીફ વિના યુરિન પણ પાસ કરવા લાગી હતી. ડૉક્ટર્સ તેમજ મેડિકલ સ્ટાફની ભારે મહેનત બાદ સાજી થયેલી લક્ષ્મીને સોમવારના રોજ હોસ્પિટલમાંથી રજા અપાઈ હતી.