સુરેન્દ્રનગર: સાયલા નજીક કાર અકસ્માતમાં રાજકોટ જેલના કર્મચારીનું કમકમાટીભર્યું મોત

સુરેન્દ્રનગર: સુરેન્દ્રનગર જિલ્લાના સાયલા નજીક એક કાર અકસ્માતમાં રાજકોટ જેલમાં ફરજ બજાવવા પોલીસકર્મીનું કમકમાટીભર્યું મોત થયું હોવાની ઘટના સામે આવી છે. પ્રાપ્ત માહિતી અનુસાર કાર પલટી જતાં અંદર સવાર પોલીસકર્મીનું મોત થયું હતું જ્યારે પરિવારના અન્ય બે સભ્યોને ઈજાઓ થતાં સારવાર માટે હોસ્પિટલ ખસેડ્યા હોવાનું જાણવા મળ્યું છે. ઘટનાને પગલે પરિવારજનો તેમજ પોલીસબેડામાં શોકનું મોજું ફરી વળ્યું છે.

શ્રાદ્ધ નિમિત્તે પરિવારે સાથે વતન જતી વખતે અકસ્માત નડ્યો
મીડિયા રિપોર્ટ અનુસાર રાજકોટ ખાતે જેલ સિપાઈ તરીકે ફરજ બજાવતા કિરીટસિંહ ભીખુભા સોલંકી શ્રાદ્ધ નિમિત્તે પરિવાર સાથે કાર લઇને પોતાના વતન મઢાદ ગામે જઇ રહ્યા હતા. ત્યારે સાયલા પાસે ગોસળના બોર્ડ નજીક ટાયર ફાટતા કાર પલટી ખાઈ ગઈ હતી. આ અકસ્માતમાં શરીરના અલગ-અલગ ભાગે ગંભીર ઈજાઓ થવાને કારણે કિરીટસિંહ સોલંકીનું મોત નીપજ્યુ હતું. જ્યારે કારમાં સવાર એક દંપતીને ઈજાઓ થઈ હતી. રિપોર્ટ અનુસાર ઈજાગ્રસ્તોમાં પ્રદીપભાઈ અસવાર અને તેમની પત્ની મિત્તલબેનનો સમાવેશ થાય છે.

અકસ્માતમાં પોલીસકર્મીનું મોત, દંપતી ઘાયલ
કાર પલ્ટી થતાં આસપાસના લોકો તાત્કાલિક દોડી આવ્યા હતા અને અંદર સવાર ત્રણેયને બહાર કાઢવાનો પ્રયાસ કરવામાં આવ્યો હતો. આ અકસ્માતમાં કારનો પણ કચ્ચરઘાણ વળી ગયો હતો. એમ્બ્યુલન્સ તેમજ પોલીસને પણ જાણ કરવામાં આવતી ટીમ ઘટનાસ્થળે પહોંચી હતી. ત્યારે કિરીટભાઈને મૃત જાહેર કરવામાં આવ્યા હતા, જ્યારે દંપતીને ઈજાઓ થતાં સારવાર માટે સાયલાની સરકારી હોસ્પિટલ ખસેડવામાં આવ્યા હતા. જ્યારે મૃતદેહને પોસ્ટમોર્ટમ માટે ખસેડાયો હતો. બનાવની જાણ થતાં રાજકોટ જેલના અન્ય કર્મચારીઓ પણ દોડી આવ્યા હતા.

ઉલ્લેખનીય છે કે, થોડા દિવસો પહેલા સાયલામાં એક છોટા હાથી સીએનજી ટેમ્પોમાં જોરદાર વિસ્ફોટ બાદ આગ લાગતા પિતા-પુત્રનું ઘટનાસ્થળે જ ભડથું થયું હતું. આ ઘટનાનો વિડીયો પણ સોશિયલ મીડિયામાં વાયરલ થયો હતો. જેમાં બ્લાસ્ટ થતાં આસપાસના હાજર લોકોમાં દોડધામ મચી ગઈ હતી. મળતી માહિતી અનુસાર ઘરથી થોડે દૂર આ અકસ્માત સર્જાયો હતો.