રાજકોટની પહેલી મહિલા પાયલટ નિધિએ કોરોના રસીનો પહેલો જથ્થો હૈદરાબાદ પહોંચાડ્યો

રાજકોટઃ કોરોનાને કારણે 2020નું વર્ષ ખુબ જ ખરાબ રહ્યું. દેશભરમાં કોરોનાની રસી ક્યારે આવે તેની આતુરતાથી રાહ જોવાઈ રહી હતી. આખરે તે દિવસ આવી ગયો અને પુનાથી દેશભરના જુદા જુદા સેન્ટરો પર કોરોનાની રસીનો પહેલો જથ્થો પહોંચાડવામાં આવ્યો. તે વચ્ચે રાજકોટની દીકરી નિધી અઢીયાએ ગુજરાતને ગૌરાવ અપાવ્યું છે. નિધી રાજકોટની પહેલી મહિલા પાયલટ છે. તેણે આજે પુનાથી હૈદરાબાદ સુધી કોરોના વેક્સિનન પ્રથમ જથ્થો પહોંચાડી પરિવારનું નામ રોશન કર્યું છે.

નિધિના પિતા બિપીનભાઈ અઢિયાએ જણાવ્યું હતું કે દેશમાં ચાલી રહેલી મહામારી વચ્ચે મારી દીકરીએ કોરોના વેક્સિન પુનાથી હૈદરાબાદ પહોંચી તે વાતનું અમને ગૌરવ છે. પિતા તરીકે આજે મને તેના પર ગર્વ છે. બિપીનભાઈ રાજકોટ મનપાના પૂર્વ સ્ટેન્ડિંગ કમિટીના ચેરમન રહી ચૂક્યા છે. તેમજ તેઓ બિપીન સોપ નામની પેઢીના સંચાલક છે. તેમને બે સંતાનમાં એક પુત્રી નિધિ અને પુત્ર મિથિલેશ છે.

નિધિના માતા માલતીબેન અઢિયાએ જણાવ્યું હતું કે નિધિ પહેલા પેસેન્જર પ્લેન ચલાવતી હતી. આજે તે દિલ્હીખી કાર્ગો પ્લેન લઈને પુના ગઈ હતી. પુનાથી વેક્સિનો પહેલો જથ્થો લઈ હૈદરાબાદ પહોંચી હતી.

નિધિએ ધોરણ 12 પછી બરોડા એમ.એસ.યુનિવર્સિટીમાં બીએસસી મેજર ઈન ફિઝિક્સ એન્ડ મેથ્સમાં પ્રવેશ મેળવ્યો હતો સાથોસાથ બરોડા ફ્લાઈંગ કલબમાં 50 કલાકની પાયલોટની તાલીમ પણ તેણે મેળવી હતી. ત્યાર બાદ નિધિએ અમદાવાદની એવિએશન એન્ડ એરોનેટ્સ લિ. ફ્લાઈંગ ક્લબમાં પાયલોટ તરીકેની ટ્રેનિંગની શરૂઆત કરી 200 કલાક તાલીમ પૂર્ણ કરી હતી.