રાજકોટ: સાંસદ અભય ભારદ્વાજની સ્થિતિ ગંભીર, સારવાર માટે ચેન્નૈ ખસેડાશે

રાજકોટ: છેલ્લા ઘણા દિવસોથી કોરોના સામે લડાઈ લડી રહેલા અને હાલમાં જ થયેલી રાજ્યસભાની ચૂંટણીમાં સાંસદ તરીકે ચૂંટાયેલા અભય ભારદ્વાજની સ્થિતિ હજુય નથી સુધરી રહી. પ્રાપ્ત વિગતો અનુસાર, ભારદ્વાજના ફેફસામાં ઈન્ફેક્શનની ગંભીર અસર થઈ હોવાના કારણે હવે તેમને વધારે ટ્રીટમેન્ટ માટે ચેન્નૈ લઈ જવામાં આવશે.

ચેન્નૈમાં તેમને MGM હોસ્પિટલમાં સારવાર આપવામાં આવશે. રાજ્યસભા સાંસદ ભારદ્વાજ દોઢ મહિનાથી પણ વધુ સમયથી કોરોનાની સારવાર લઈ રહ્યા છે. ઉલ્લેખનીય છે કે, કોંગ્રેસના નેતા ભરતસિંહ સોલંકી પણ મહિનાઓ સુધી હોસ્પિટલમાં રહ્યા બાદ તાજેતરમાં જ ડિસ્ચાર્જ થયા હતા. જોકે, ભારદ્વાજની સારવાર ગુજરાતમાં હવે મુશ્કેલ લાગતા તેમને ચેન્નૈ ખસેડવાનો નિર્ણય કરાયો છે.

સુરતથી પણ મેડિકલ એક્સપર્ટ્સની ટીમને ભારદ્વાજની સારવાર કરવા માટે રવાના કરવામાં આવી હતી. જોકે, તેની ટ્રીટમેન્ટથી પણ ભારદ્વાજની સ્થિતિમાં જોઈએ તેવો ફરક પડ્યો નથી. પ્રાપ્ત વિગતો અનુસાર, તેમના ફેફસાંમાં ગઠ્ઠા જામી ગયા છે. અમદાવાદથી આવેલી ટીમે પણ તેમને તપાસી સ્થિતિ ગંભીર હોવાનો મત વ્યક્ત કર્યો હતો.

એર એમ્બ્યુલન્સ દ્વારા ભારદ્વાજને ચેન્નૈ લઈ જવામાં આવશે. ચેન્નૈમાં ફેફસાંનું ટ્રાન્સ્પ્લાન્ટ કરવાની પણ વ્યવસ્થા ઉપલબ્ધ છે. વળી, ત્યાંના લંગ સ્પેશિયાલિસ્ટ ડૉ. કે.આર. બાલાક્રિશ્નન આખા દેશમાં નામના ધરાવે છે. ડૉ. બાલાક્રિશ્નન કોરોના આવ્યો ત્યારથી અત્યંત ક્રિટિકલ સ્થિતિમાં રહેલા કેસોની પણ સફળતાપૂર્વક સારવાર કરી ચૂક્યા છે.

સુરતના ડૉ. સંકેત મહેતાને કોરોનાને કારણે ફેફસાંમાં 90 ટકા જેટલું ડેમેજ થયું હતું. તેમના ફેફસાં ટ્રાન્સ્પ્લાન્ટ કરવાની નોબત આવતા તેમને ચેન્નૈ એરલિફ્ટ કરાયા હતા. જોકે, ડૉ. બાલાક્રિશ્નને તેમની ટ્રીટમેન્ટ હાથ ધરતા હાલ ડૉ. મહેતાની સ્થિતિ ખૂબ જ સારી છે.