ગીરઃ રાષ્ટ્રપતિ માટે બનાવવામાં આવેલ ખાસ રોડ પ્રાણીઓ માટે બન્યો મોતનો રસ્તો

I am Gujarat

રાષ્ટ્રપતિ માટનો રોડ પ્રાણીઓ માટે બન્યો મોતનો રોડ

રાજકોટઃ થોડા દિવસ પહેલા દેશના રાષ્ટ્રપતિ રામનાથ કોવિંદ તેમના પરિવાર સાથે ગીર અભ્યારણની મુલાકાત લેવા માટે આવ્યા હતા. રાષ્ટ્રપતિના પ્રવાસ દરમિયાન ગીર અભ્યારણમાંથી પસાર થતો મેંદરડા-તલાલા રોડનો 32 કિમી જેટલો રોડ રીસરફેસ્ડ કરવામાં આવ્યો હતો. તેમજ આ રોડ પર આવતા તમામ સ્પીડ બ્રેકર દૂર કરવામાં આવ્યા હતા. જોક હવે આ જ રોડ વન્ય પ્રાણીઓ અને માણસો માટે મોતનો રસ્તો બની ગયો છે. અમારા ન્યૂઝ Whatsapp પર મેળવવા અહીં ક્લિક કરો

રાષ્ટ્રપતિ માટે રોડ પરથી સ્પીડ બ્રેકર હટાવાયા હતા

પાછલા થોડા દિવસોમાં આ રોડ પર આશરે 12 જેટલા વન્યપ્રાણીઓ ઝડપથી પસાર થતા વાહનોની અડફેટે આવતા મોતને ભેટ્યા છે. વન વિભાગના સૂત્રોના જણાવ્યા મુજબ આ રોડ પર 3 ફોરેસ્ટ ચેકપોસ્ટ છે. આ રોડને નવો બનાવવામાં આવ્યો તે પહેલા દર અડધો કિમીએ એક બમ્પ હતો જેના કારણે વાહનોની સ્પીડ ખૂબ ધીમી રહેતી હતી. પરંતુ હવે સ્પીડ બ્રેકર ન હોવાથી વાહનો ખૂબ સ્પીડમાં ચાલતા હોય છે.

સ્પીડબ્રેકર હટાવતા 15 દિવસમાં ડઝન પ્રાણીઓ મર્યા

એનિમલ એક્ટિવિસ્ટ ધર્મેશ કગથરાએ કહ્યું કે, ‘પાછલા 15 દિવસમાં 2 શિયાળ, ચાર હરણ, 2 નોળિયા, એક સિવેટ અને એક જંગલી બિલાડી રોડ એક્સિડેન્ટના કારણે માર્યા ગયા છે. જ્યારે બુધવારે એક વ્યક્તિનું પણ રોડ એક્સિડન્ટમાં મોત થયું હતું. પાછલા પંદર દિવસમાં 5 કાર અને 1 બાઇકના અકસ્માત નોંધાયા છે.’

દર 400 મીટરે સ્પીડ બ્રેકરનો નિયમ પણ….

અન્ય એક એક્ટિવિસ્ટ રેવતુભા જાડેજાએ કહ્યું કે, ‘નેશનલ વાઇલ્ડ લાઇફ બોર્ડના નિયમ મુજબ અભ્યારણમાંથી પસાર થતા રોડ પર દર 400 મીટરે એક સ્પીડ બ્રેકર હોવું જોઈએ પરંતુ મેંદરડા રોડ પર એક પણ સ્પીડ બ્રેકર નથી.’ વન વિભાગ સામે સવાલ ઉઠાવતા તેમણે વધુમાં કહ્યું કે, ‘શું વનવિભાગ કોઈ દીપડો કે પછી સિંહના મોતની રાહ જુવે છે કે શું. શા માટે આટલી ઢીલાશ રાખવામાં આવે છે?’

પ્રાણી પ્રેમીઓમાં રોષ

જ્યારે આ વિસ્તારના અંગે ચીફ કંઝર્વેટર ઓફ ફોરેસ્ટ ડી.ટી. વસાવડાને પૂછવામાં આવ્યું ત્યારે તેમણે કહ્યું કે, ‘અમે રાજ્યના રોડ અને મકાન વિભાગને પહેલાથી જ આ અંગે અરજી કરી દીધી છે અને હવે લેખીત એપ્લિકેશન લખવાની પ્રક્રિયા પણ હાથ ધરવામાં આવી છે.’