રણમાંથી નિકળ્યું રતન, અગરિયાનો દીકરો એરફોર્સમાં મેડિકલ આસિસ્ટન્ટ બન્યો

કહેવાય છે કે પોતાની ચમકથી બધાને મોહિત કરતા હીરા કોલસાણી ખાણમાંથી જ નીકળે છે તેમ રણમાં મીઠું પકવતા એક પરિવારના આ યુવકે પોતાના પરિવારનું જ નહીં પરંતુ ગુજરાતનું પણ નામ રોશન કર્યું છે. આપણા ગુજરાતનાં ખુણેખુણાના ગામડાઓમાં અનોખી પ્રતિભાઓ ધરબાયેલી પડી છે. સૌથી છેવાડાના માનવી તરીકે ઓળખાતા એવા રણમાં બાવડાના જોરે મીઠું પકવતા ગરીબ અગરિયાનો દીકરો હવે એરફોર્સમાં મેડિકલ આસિસ્ટન્ટ બની એરફોર્સના જવાનોનું હેલ્થ તપાસવાનું કામ કરશે.

'મન હોય તો માળવે જવાય' એ ઉક્તિને ખારા રણમાં મીઠું પકવવાનું કામ કરતા ગરીબ અને પછાત અગરિયાના દીકરાએ યથાર્થ ઠેરવી છે. ખારાઘોડાના રણમાં ચામુંડા મંડળીમાં મીઠું પકવવાનું કામ કરતા ગોપાલભાઇ ગુગાભાઇ છનુરા અને હંસાબેન છનુરાના નાના દીકરા શ્રવણ છનુરાએ લીંબડી મેડિકલ કોલેજમાં ડોક્ટરીનો અભ્યાસ કરતા કરતા એરફોર્સ માટેની મેડિકલ આસિસ્ટન્ટ માટેની રીટર્ન, ફિઝીકલ અને મેડિકલ ટેસ્ટ સફળતા પૂર્વક પાસ કરીને હવે આગામી દિવસોમાં બેંગ્લોર ટ્રેનીંગમાં જઇને આ અગરિયાનો દીકરો એરફોર્સના જવાનોનું હેલ્થ તપાસવાનું કામ કરશે.

અગરીયા ગોપાલભાના પરિવારમાં 3 દીકરીઓ અને બે દીકરાઓ છે. ખારાઘોડા રણમાં વર્ષોથી મીઠું પકવવાનું કામ કરતા ગોપાલભાઇ છનુરા અને હંસાબેન છનુરાના પાંચ સંતાનો પૈકી નાના દીકરા શ્રવણ છનુરાએ ધોરણ એકથી આઠનો અભ્યાસ નિમકનગર પ્રાથમિક શાળામાં અને ધોરણ 9થી 12નો અભ્યાસ હળવદ તક્ષશિલા વિદ્યાલયમાં પૂર્ણ કરી મેડિકલના અભ્યાસ માટે લીંબડી મેડિકલ કોલેજમાં પ્રવેશ મેળવી એરફોર્સમાં મેડિકલ આસિસ્ટન્ટની તમામ પરીક્ષાઓ સફળતાપૂર્વક પાસ કરી હતી. આ વર્ષે માર્ચ માસમાં લેખીત પરીક્ષા અને 1600 મીટર દોડ, 10 પુસ અપ્સ અને 10 શીટ અપ્સ નિયત સમય મર્યાદામાં પૂર્ણ કરવાની સાથે તાજેતરમાં ઓકટોબરમાં મેડિકલ તપાસમાં પણ ઉતીર્ણ થયો હતો. હવે નવેમ્બરના અંતમાં મેરીટ લિસ્ટ બહાર પડ્યા બાદ બેંગલોરમાં એરફોર્સનો ટ્રેનીંગ કેમ્પ યોજાશે.

આ અંગે અગરિયા યુવાન શ્રવણ છનુરાએ જણાવ્યું કે, લીંબડી મેડિકલ કોલેજમાં પ્રવેશ મેળવ્યા બાદ મારો મેડિકલ અભ્યાસનો ફી સહિતનો તમામ ખર્ચ અગરિયા હિત રક્ષક મંચના હરણેશભાઇ પંડ્યા, પંક્તિબેન જોગ અને ભરતભાઇ સોમેરા સહિતની ટીમેં ઉપાડ્યો હતો. રણમાં મીઠું પકવતા અગરિયાનો દીકરો એરફોર્સમાં જોડાવવાના સમાચાર સાંભળી સંસ્થાના લોકો પણ રાજીના રેડ થઇ ગયા હતા.

આ અંગે અગરિયા યુવાન શ્રવણ છનુરાએ આંખોમાં ઝણઝણીયા સાથે જણાવ્યું કે, મારા મોટ‍ા ભાઇ કલ્પેશે પણ આર્ટસ વિષયમાં અભ્યાસ કર્યો છે. પણ અમારા ઘરની પરિસ્થિતિ એટલી વિકટ હતી કે, મારા માતા-પિતા અમારા બંનેનો ભણવાનો ખર્ચો ઉપાડી શકે એમ નહોતા. આથી મારા મોટા ભાઇ કલ્પેશે મારા ભણતર માટે પોતે ભણવાનું છોડી માતા-પિતા સાથે રણમાં મીઠું પકવવાના કામમાં જોતરાઇ ગયો હતો.

એરફોર્સની મેડિકલ આસિસ્ટન્ટની પરીક્ષા સફળતાપૂર્વક પાસ કરનાર શ્રવણ છનુરા ગર્વ સાથે જણાવે છે કે, મારી સૌથી નાની બહેન શિલ્પા ભણવામાં મારા કરતા પણ હોંશીયાર છે. એણે ધોરણ 9માં 92% માર્કસ સાથે ઉતીર્ણ થઇ હાલ એ દસમા ધોરણમાં છે. અને બાકીની બંને બહેનો હાલમાં ઘરકામ કરે છે. અને મારા માતા-પિતા અને મોટા ભાઇ હાલમાં ખારાઘોડા રણમાં મીઠું પકવવા જ ગયેલા છે.