રાજકોટઃ તું ક્યાં છે સેલ્ફી મોકલ, વીડિયો કોલ કરી દેખાડ, શિક્ષિકા પત્ની પર શંકાશીલ પતિનો અત્યાચાર

રાજકોટ : આપણે ત્યાં સ્ત્રીને પુરુષની સમોવડી બની ગઈ હોવાના દાવાઓ કરવામાં આવી રહ્યા છે. પરંતુ આજે પણ એવા બનાવ સામે આવે છે જેને સાંભળીને લાગે છેકે સમોવડી હોવાની વાત ફક્ત ચર્ચાઓ સુધી જ સિમિત છે. દિવસેને દિવસે સ્ત્રીઓ પર અત્યાચાર થતા હોવાના કિસ્સાઓ સામે આવી રહ્યા છે. ત્યારે રાજકોટમાં રહેતી પરિણીત શિક્ષિકાએ પોતાના પતિ તેમજ સાસરીયાઓના દ્વારા આપવામાં આવતા ત્રાસ મામલે મહિલા પોલીસમાં ફરિયાદ નોંધાવી છે.

સમગ્ર બનાવ અંગે પરિણીત શિક્ષિકાએ પોતાના પતિ, સસરા, સાસુ અને અમદાવાદ રહેતી નણંદ કૃતિ તેમજ બરોડા રહેતી નણંદ પૂર્ણી વિરુદ્ધ ફરિયાદ નોંધાવી છે. ત્યારે મહિલા પોલીસ મથકમાં શિક્ષિકાએ ફરિયાદમાં જણાવ્યું છે કે, 9 જૂન 2015ના રોજ મારા લગ્ન જ્ઞાતિના રીત રિવાજ મુજબ થયા હતા. મેં એમ.એસ.સી બી.એડ્ સુધીનો અભ્યાસ કર્યો છે અને હાલ હું શિક્ષિકા તરીકે નોકરી કરું છું. છેલ્લા સાડા ત્રણ વરસથી હું મારા માતા-પિતાના ઘરે છું. લગ્ન થયા બાદ હું મારા સાસુ-સસરા સાથે સંયુક્ત પરિવારમાં રહેતી હતી પરંતુ લગ્નના પાંચ દિવસ બાદ જ પતિ અને સાસુ નાની નાની વાતોમાં મારી સાથે ઝઘડો શરૂ કરી દેતા હતા.

તેમણે વધુમાં આપવીતી જણાવતા કહ્યું કે, હું લગ્ન પહેલાંથી જ નોકરી કરતી હતી, જેથી લગ્ન બાદ પણ મારી નોકરી શરૂ હોય જેથી જે પણ પગાર આવતો તે મારા પતિ મારી પાસે લઈ લેતા હતા, ક્યારે લગ્ન દરમિયાન ઘરખર્ચના જે કોઈપણ રુપિયાની જરુર હોય તે મારે મારા સાસુ પાસેથી લેવા પડતા હતા. નોકરીએ જાઉં તો પણ સાસુ કામકાજ બાબતે ઝઘડા કરતા હતા તો સાથે જ મારા સસરા મને કહેતા હતા કે કોઈ સાથે સંબંધ રાખવા નહીં તમારા માવતરને પણ ભૂલી જાવ.

લગ્ન બાદ નોકરી કરવા જાઉં તે સમય દરમ્યાન મારા સાસુ અને તેમની બંને દીકરીઓ એટલે કે મારી નણંદ પતિને મારા વિરુદ્ધ ચઢાવતા હતા. મારી નણંદો મારા સાસુને મારી વિરુદ્ધ ચઢવણી કરતાં હતા, તો સાથે જ મારા પતિને પણ મારી વિરુદ્ધ ભડકાવતા હતા. એક વખત તો મારા નણંદની ચડામણી ના કારણે મારા પતિએ મારું ગળું દબાવી તને જીવતી છોડીશ નહીં એમ કહી માર માર્યો હતો, તો સાથે જ મારા માવતરમાં પ્રસંગ હોય તો મારા પતિ સાથે આવતા નહીં. તેમ જ મને જવાબ પણ આપતા નહોતા,

તો સાથે જ લગ્ન જીવન દરમિયાન અનેક વખત કરીયાવર બાબતે મારા સાસરિયાઓએ મને મેણા ટોણા પણ માર્યા હતા.લગ્ન બાદ હું નોકરી કરતી હતી ત્યારે હું નોકરીના સ્થળે હોય તો મારા પતિ મારી સેલ્ફી મંગાવતા હતા, તો સાથે જ રજાના દિવસો દરમિયાન નોકરીની કોઈ મીટીંગ કે વિજ્ઞાન મેળો હોય અને હું બહાર જાઉં તો પણ મારા પતિ હું જે જગ્યાએ હો ત્યાંની સેલ્ફી મંગાવતા હતા, તો સાથે જ હું સ્કુલમાં છું કે નહીં તે અંગે ખાતરી કરવા સ્કૂલમાં વારંવાર લેન્ડલાઈનમાં ફોન કરતા હતા. આમ લગ્ન બાદ પણ મારા પતિ મારા ચારિત્ર્ય અંગે અનેકવાર શંકા-કુશંકા કરતા હતા અને મને નોકરી મૂકી દેવાનું દબાણ કરતા હતા.

ઘરની કોઈ ચીજ વસ્તુ લેવા સાસુ પાસે રુપિયા માગું તો તેઓ આપતા નહીં અને કહેતા કે, તું તારો પગાર આપીશ ત્યારે તને તેમાંથી રુપિયા મળશે, જ્યારે આ વાત મેં મારા પતિને કરી ત્યારે તેઓએ પણ મારી સાથે ઝઘડો કર્યો, તો સાથે જ એક મહિના સુધી તેઓ મારી સાથે સુતા પણ નહોતા, તેમજ ઘરના કોઈ પણ સભ્યો મારી સાથે વાત પણ કરતા નહોતા તો સાથે જ મારા હાથે બનાવવામાં આવેલ રસોઈ પણ ઘરના કોઈ સભ્યો ખાતા નહોતા.