ગાડી ભાડુ ચૂકવી રહેલી માતાની આંગળી છોડાવી દોડ્યું બાળક, ટ્રકની અડફેટે આવતા મોત

જામનગરઃ જામનગર જિલ્લાના જોડિયા નજીક ખીરી ગામ પાસે એક કરૂણ અકસ્માત સર્જાયો હતો જેમાં માતાની નજર સામે જ તેના છ વર્ષીય બાળકનું મોત થયું હતું. આ બાળક ટ્રકની અડફેટે આવી ગયું હતું જેના કારણે તેનો જીવ ગયો હતો. માતાની નજર સામે જ બાળકનું મોત થયું હોવાનું જાણી કરૂણ દ્રશ્યો સર્જાયા હતા.

ઘટનાની વિગતો પ્રમાણે મૂળ આલીયાબાડા ગામના વતની અને હાલમાં જોડિયા નજીક ખીરી ગામમાં રહેતા રાજુભાઈ ચાવડિયાનો છ વર્ષીય પુત્ર અમિત પોતાની માતા ગીતાબહેન સાથે મોગલ માતાના દર્શને ગયો હતો. માતા પોતાના બાળક સાથે ઈકો કારમાં બેસીને ખીરી ગામના પાટિયા પાસે પત આવ્યા હતા.

બંને જણા ઈકોમાંથી નીચે ઉતર્યા હતા ત્યારે માતા ગાડી ચાલકને ભાડુ આપી રહ્યા હતા. તેવામાં તેમનો પુત્ર આંગડી છોડાવીને રોડ ક્રોસ કરવા માટે દોડ્યો હતો. આ દરમિયાન બાળક પૂરપાટે વેગે આવી રહેલા ટ્રકની અડફેટે આવી ગયો હતો. જેના કારણે બાળકનું ઘટના સ્થળે જ મોત નીપજ્યું હતું. માતા હજી કંઈ સમજે તે પહેલા જ તેમની નજર સમક્ષ તેણે પોતાનો વ્હાલસોયો પુત્ર ગુમાવી દીધો હતો. આ ઘટનાની જાણ થયા બાદ અરેરાટી ફેલાઈ ગઈ હતી.

આ અકસ્માત બાદ ટ્રક ચાલક ટ્રક છોડીને ત્યાંથી ભાગી ગયો હતો. મૃતક બાળકના પિતા રાજુભાઈ ચાવડિયાએ ટ્રક ચાલક વિરુદ્ધ ફરિયાદ નોંધાવી હતી. પોલીસે પણ ટ્રક કબજે લીધો હતો અને ટ્રક ચાલકને પકડવા માટે શોધ આદરી છે.