સાળંગપુર કષ્ટભંજન દેવનું સોશિયલ મીડિયા અકાઉન્ટ હેક, ના મૂકવાના વિડીયો મૂકાયા

કોરોના વાયરસના ફેલાવાના કારણે ભક્તો લોકોની ભીડ થતી હોય તેવી જગ્યાઓ પર તકેદારીના પગલા ભરવામાં આવે છે. આવામાં મંદિર સહિતની જગ્યાઓ પર ગયા વગર ભક્તો ભગવાનના રોજના શણગાર અને આરતીના દર્શન કરી શકે તે માટે વિવિધ મંદિર મેનેજમેન્ટ દ્વારા સોશિયલ મીડિયા પ્લેટફોર્મનો ઉપયોગ કરાય છે. આવામાં બોટાદના પ્રખ્યાત સાળંગપુરના કષ્ટભંજન હનુમાન મંદિરનું ફેસબૂક પેજ હેક કર્યું છે. આ પેજને હેક કરીને તેનો દુરોપયોગ કરાયો હોવાની ઘટના પણ સામે આવી છે. આવામાં આ ઘટના બદલ મંદિર દ્વારા ફરિયાદ પણ નોંધાવવામાં આવી છે.

કષ્ટભંજન હનુમાન મંદિરના ફેસબૂક પર પર લાખોની સંખ્યામાં દરરોજ ભક્તો હનુમાન ભગવાનના દર્શન કરવા માટે પહોંચતા હોય છે આવામાં આજે જ્યારે ઘણાં ભક્તોએ કષ્ટભંજન હનુમાન ફેસબૂક પેજ પર ક્લિક કર્યું તો તેમને ભારે આશ્ચર્ય થયું. એક ક્ષણ માટે તો તેમને એવું લાગ્યું કે તેઓ કોઈ બીજા પેજ પર આવી ગયા છે, કારણ કે તેમને અહીં ભગવાનના નહીં પણ હોલિવૂડના ફિલ્મી વિડીયો જોવા મળ્યા હતા. આ પછી તપાસ કરતા માલુમ પડ્યું કે હષ્ટભંજન હનુમાન મંદિરનું ફેસબૂક પેજ હેક કરવામાં આવ્યું છે.

સ્થાનિક મીડિયા રિપોર્ટ્સ અનુસાર મંદિરનું ફેસબૂક પેજ હેક કરીને તેના હેકર્સ દ્વારા દુર્ઘટનાગ્રસ્ત વિમાનમાંથી લોકોને બચાવવાની કામગીરી કરાતી હોય તેવો વિડોયો અને એક હોલિવૂડ ફિલ્મોનો વિડીયો શેર કર્યો હતો. મંદિર દ્વારા આ અંગે બોટાદ જિલ્લા પોલીસ વડાને ફરિયાદ કરી છે. આ ફરિયાદમાં એમ પણ જણાવવામાં આવ્યું છે કે સવારે 7-30 પછી અકાઉન્ટ હેક થયું છે.


સ્થાનિક મીડિયા રિપોર્ટ્સ મુજબ મંદિર દ્વારા ભક્તોને જણાવવામાં આવ્યું છે કે, ફેસબૂક પેજ હેક થયું છે માટે તેઓ દર્શન માટે મંદિરના અન્ય સોશિયલ મીડિયા પ્લેટફોર્મનો ઉપયોગ કરી શકે છે. બીજી તરફ પેજ હેકર્સની પણ તપાસ કરવામાં આવી રહી છે. આ મંદિરનું પેજ પાછલા કેટલાક સમયથી ખુલી નથી રહ્યું એનો મતલબ કે, હેકર્સ દ્વારા કઈ રીતે તેને હેક કરવામાં આવ્યું તે દિશામાં તપાસ ચાલી રહી હોવાની સંભાવના છે.