108ની ટીમે રસ્તામાં જ ડિલિવરી કરાવી મહિલા-નવજાત બાળકોનો બચાવ્યો જીવ

ગુજરાતમાં 108ની એમ્બ્યુલન્સની સેવાથી ઘણા લોકોના જીવ બચી ગયા છે. આવી જ એક ઘટના લોધિકા તાલુકાના ખાંભા ગામના સાપર વિસ્તારમાં બની છે. જ્યાં 108ની ટીમે સમય સૂચકતા દાખવીને રસ્તામાં જ એક મહિલાની પ્રસૂતિ કરાવી હતી અને તેના નવજાત બાળકોને પણ બચાવી લીધા હતા.

ખાંભા ગામના સાપર વિસ્તારમાં 108 એમ્બ્યુલન્સને પ્રસૂતિનો કોલ આવ્યો હતો. જેના કારણે 108ની ટીમ તાત્કાલિક ઘટના સ્થળે પહોંચી ગઈ હતી. જોકે, ત્યાં પહોંચ્યા પછી ખ્યાલ આવ્યો હતો કે તે મહિલાને અધૂરા મહિને પ્રસૂતિની પીડા ઉપડી હતી. જેથી તેમને તાત્કાલિક હોસ્પિટલ ખસેડવાની જરૂર હતી. પરંતુ વધારે સારવારની જરૂર હોવાથી દર્દીને પીડીયુ હોસ્પિટલ રાજકોટ રીફર કરવામાં આવ્યા હતા.
મહિલાને રાજકોટ લઈ જવામાં આવી રહી હતી પરંતુ આ દરમિયાન રસ્તામાં રાવકી ગામ પાસે મહિલાની પ્રસૂતીની પીડા વધી ગઈ હતી. તેવા સમયે એએમટી અને 108ના પાયલટે સમય સૂચકતા વાપરી હતી. તેમને લાગ્યું હતું કે મહિલાની અહીં જ પ્રસૂતી કરાવવી પડશે તેથી તેમણે ડોક્ટરના માર્ગદર્શન હેઠળ જોડિયા બાળકોની ડિલિવરી સ્થળ પર જ કરાવી હતી.
જોકે, તેમની મુશ્કેલી આટલેથી ઓછી થઈ ન હતી કેમ કે અધૂરા મહિને જન્મેલા બાળકોને શ્વાસ લેવામાં તકલીફ જણાઈ હતી. તેથી તેમણે તરત જ બાળકોને ઓક્સિજન આપીને તેમનો જીવ બચાવી લીધો હતો. આમ 108ની ટીમે સમય સૂચકતા વાપરીને માતા અને નવજાત બાળકોનો જીવ બચાવી લીધો હતો. બાદમાં તેમને સારવાર માટે રાજકોટ સિવિલ હોસ્પિટલ લઈ જવામાં આવ્યા હતા.