અમરેલીમાં ભેંસોને બચાવતા ભાઈ પર સિંહે હુમલો કર્યો તો બીજા ભાઈએ હિંમત કરીને સિંહને ભગાડ્યો

રાજકોટઃ આજે અમરેલીમાં 35 વર્ષના યુવક પર સિંહ દ્વારા હુમલાની ઘટના બની હતી, જેમાં યુવકને ઈજાઓ થયા બાદ સારવાર માટે ખસેડવામાં આવ્યા હતા. હવે તેમની તબીયત સ્થિર હોવાનું જાણવા મળી રહ્યું છે. જ્યારે યુવક પોતાની ભેંસોને બચાવવા માટે સિંહની સામે પડ્યો તો સિંહે ભેંસોને છોડીને તેને નિશાન બનાવ્યો હતો. જોકે, આ ઘટના દરમિયાન યુવકનો ભાઈ સિંહની સામે થયો અને સિંહને ત્યાંથી ભગાડવામાં સફળ થયો.

જોરુ જેબલિયા તેમની ભેંસો પાસે હતા ત્યારે અચાનક ભેંસો પર ખતરો આવી પડ્યો હતો. જોરુ પોતાની ભેંસોને બચાવવા માટે ગયા ત્યારે સિંહે તેમના પર હુમલો કરી દીધો હતો.

ફોરેસ્ટ ડિપાર્ટમેન્ટના જણાવ્યા પ્રમાણે જોરુ ધારી તાલુકાના દહિધાના રહેવાસી છે, તેમના પર સિંહ દ્વારા હુમલો કરી દેવામાં આવ્યો તો તેમને પીઠ અને પગાના ભાગે ઈજાઓ થઈ હતી. ઘાયલ થયેલા જોરુની સ્થિતિ હવે સ્થિર છે અને તેમને સરકારી હોસ્પિટલમાં સારવાર માટે ખસેડવામાં આવ્યા છે.

જોરુ સવારે તબેલામાં હતા અને દૂધ દોહી રહ્યા હતા, આ દરમિયાન સવારના 5 વાગ્યા હતા અને અચાનક તેમના તબેલા પાસે સિંહ જોવા મળ્યો હતો. આ પછી તેઓ સિંહને ડરાવવાની કોશિશ કરીને ભેંસોથી દૂર કરવાનો પ્રયાસ કરતા હતા ત્યારે સિંહે તેમના પર હુમલો કરી દીધો હતો.

પ્રતાબ જેબલિયા કે જેઓ જોરુના ભાઈ છે તેમણે જણાવ્યું કે, જ્યારે મે જોયું કે સિંહ જોરુ પર હુમલો કરી રહ્યો છે તો હું તેનાથી સિંહને દૂર કરવા માટે લાકડી લઈને ગયો હતો. આ જોઈને ગભરાયેલો સિંહ ત્યાંથી નાસી ગયો હતો.