બે વખત થયા હતા યુવકના છૂટાછેડા, ત્રીજા લગ્નના ત્રીજા જ દિવસે દુલ્હને આપ્યો ઝટકો

રાજ્યમાં ખોટા લગ્ન કર્યા બાદ યુવકના રૂપિયા લઈને છૂમંતર થઈ જતી લૂંટેરી દુલ્હનની ઘટનાઓ અવારનવાર સામે આવે છે. જામનગરમાં પણ એક યુવક સાથે આવી જ રીતે છેતરપિંડી થઈ છે. આ યુવકના અગાઉ બે વખત લગ્ન થયા હતા અને બંને વખતે તેના છૂટાછેડા થઈ ગયા હતા. જેના કારણે યુવકે ત્રીજા લગ્ન કર્યા હતા. જોકે, આ વખતે તેને વધારે મોટો ફટકો પડ્યો છે જેમાં લગ્નના ત્રીજા જ દિવસે તેણે જે યુવતી સાથે લગ્ન કર્યા હતા તે તેના રૂપિયા અને દાગીના લઈને ગાયબ થઈ ગઈ હતી.

મળતી માહિતી પ્રમાણે જામનગરમાં ખોડીયાર કોલોની વિસ્તારમાં રહેતા પ્રિતેશ શાહ નામના યુવાનના અગાઉ બે વખત છૂટાછેડા થયા હતા. બાદમાં તેણે નાગપુરની કન્યા સાથે લગ્ન કરવાનું નક્કી કર્યું હતું. તેમણે લાલપુર તાલુકાના કાના શિકારી ગામના દંપતિ વિજય બારોટ અને કાજલબેન બારોટ સાથે દોઢ લાખ રૂપિયામાં લગ્નનું નક્કી કર્યું હતું.

આ દંપતિએ નાગપુરની વતની પાયલ બંસોડ નામની યુવતી સાથે મૈત્રીકરાર સાથે લગ્ન કરાવ્યા હતા. જેમાં પાયલના ધર્મના ભાઈ અંકિત નાગપુરીની મદદ લીધી હતી. જોકે, 24 ફેબ્રુઆરી 2020એ દંપતિને દોઢ લાખ આપ્યા પછી મૈત્રીકરાર કર્યા હતા અને પાયલને પોતાના ઘરે લઈ ગયો હતો. ઘરે જઈને તેમણે યુવતીને થોડા ઘરેણા પણ આપ્યા હતા.

જોકે, પાયલ ત્રણ દિવસ ઘરે રોકાયા બાદ છૂમંતર થઈ ગઈ હતી. જેથી પ્રિતેશ શાહે દલાલ દંપતિને જાણ કરી હતી. તેણે તેમને કહ્યું હતું કે તેઓ તેની પત્નીને પાછી બોલાવી આપે અથવા તો દોઢ લાખ રૂપિયા પાછા આપે. તેણે એક વર્ષ સુધી પત્નીની શોધખોળ ચાલું રાખી હતી અને દોઢ લાખની ઉઘરાણી પણ ચાલું રાખી હતી.

અંતે પોતાની સાથે છેતરપિંડી થઈ હોવાનો ખ્યાલ આવતા તેમણે તરત જ જામનગરના જિલ્લા પોલીસ વડાનો સંપર્ક કર્યો હતો અને ફરિયાદ નોંધાવી હતી. પોલીસે વિજય બારોટ અને કિંજલ બારોટ સામે ગુનો નોંધ્યો હતો અને પાયલ તથા તેના ધર્મના ભાઈ અંકિત સામે પણ ગુનો નોંધ્યો હતો. પોલીસની પ્રાથમિક તપાસમાં સામે આવ્યું હતું કે પાયલે અગાઉ પણ અન્ય કેટલાક યુવાનો સાથે આ જ રીતે લગ્ન કર્યા હતા અને બાદમાં તેમના રૂપિયા લઈને ભાગી ગઈ હતી. હાલમાં પોલીસ તેને શોધી રહી છે.