ભરશિયાળે માવઠું: સૌરાષ્ટ્રના અનેક ભાગોમાં કમોસમી વરસાદ, ખેડૂતોની ચિંતા વધી

રાજકોટ: સૌરાષ્ટ્રના અનેક વિસ્તારમાં આજે કમોસમી વરસાદ પડતા ખેડૂતોમાં ચિંતાનો માહોલ જોવા મળી રહ્યો છે. મળતી માહિતી પ્રમાણે આજે બપોર બાદ વાતાવરણમાં પલ્ટો આવતા અમરેલીના ખાંભા અને સાવરકુંડલા પંથકમાં કમોસમી વરસાદ પડ્યો. આ ઉપરાંત કોડિનાર, સુત્રાપાડા, તળાજા, ગારીયાઘાર અને મહુવામાં પણ વરસાદ પડ્યો હોવાનું જાણવા મળ્યું છે. કમોસમી વરસાદના કારણે શિયાળા પાકને નુકસાન થાય તેવી શક્યતા છે. હવામાન વિભાગના જણાવ્યા અનુસાર વેસ્ટર્ન ડિસ્ટર્બન્સના કારણે રાજ્યના કેટલાય વિસ્તારોના વાતાવરણમાં પલ્ટો આવ્યો છે.

કમોસમી વરસાદની આગાહી
રાજ્યમાં આવેલા હવામાનમાં પલ્ટામાં આજે સાબરકાંઠા, મહેસાણા, બનાસકાંઠા, સુરત અને ભરુચની સાથે સૌરાષ્ટ્રના ગીર સોમનાથ, ભાવનગર અને અમરેલીમાં હળવો વરસાદ થવાની સંભાવના વ્યક્ત કરાઈ હતી. જ્યારે શુક્રવારે આણંદ, ભરુચ અને વડોદરાની સાથે ભાવનગરમાં કમોસમી વરસાદની આગાહી વ્યક્ત કરવામાં આવી છે.

4 દિવસ સુધી તાપમાન યથાવત રહેશે
સામાન્ય રીતે ડિસેમ્બરમાં કડકડતી ઠંડીનો અનુભવ થતો હોય છે પરંતુ આ વર્ષે પવન દક્ષિણ પૂર્વ દિશામાં ફૂંકાઈ રહ્યા છે. જેના લીધે તાપમાન સામાન્ય કરતા ઊંચું રહ્યું છે. સ્થાનિક હવામાન વિભાગના ડિરેક્ટર ડૉ. જયંત સરકારે દક્ષિણ પૂર્વ તરફ ફૂંકાતા પવન વિશે જણાવીને આગામી 4 દિવસ સુધી તાપમાન યથાવત રહેવાની આગાહી વ્યક્ત કરી છે.

એક તરફ લાંબું ચોમાસું અને શિયાળામાં પણ દિવસના મોટાભાગ દરમિયાન ઉનાળાનો અનુભવ અને હવે વરસાદની સંભાવના ખેડૂતોની ચિંતિત કરી રહી છે. રાજ્યમાં બે દિવસ કમોસમી માવઠાની આગાહી કરવામાં આવી છે. સામાન્ય રીતે આ સમયમાં ઠંડી જોર પકડી ચૂકી હોય છે તેના બદલે રાજ્યના મોટાભાગના સ્થળો પર લઘુત્તમ તાપમાનનો પારો 15 ડિગ્રીની આસપાસ નોધાઈ રહ્યો છે.