ભાવનગરઃ 30 વર્ષ સુધી સેનામાં સેવા આપ્યા બાદ અંલગ પહોંચ્યું યુદ્ધ જહાજ INS વિરાટ

અમદાવાદ: દેશનું ઐતિહાસિક યુદ્ધ જહાજ, 'ગ્રેટ ઓલ્ડ લેડી' નાં નામથી ઓળખાતું અને સમુદ્ર પર રાજ કરી ચૂકેલું વિરાટ આજે અલંગની જમીન પર આવી પહોંચ્યું હતું. બીચિંગ સમયે INS વિરાટને અંતિમ સલામી અપાઈ તેમજ ભારતીય યુધ્ધ જહાજ વિરાટનો મહાનુભાવોએ આભાર વ્યક્ત કર્યો. આ અંગેનો એક વિડીયો પણ કેન્દ્રીય મંત્રીએ શેર કર્યો છે.


જહાજને આજે મોટી ભરતીમાં અલંગ ખાતે આવેલા પ્લોટ નં.9માં બીચ કરવા માટે કવાયત હાથ ધરવામાં આવી હતી. આ પ્રસંગે કેન્દ્રીય શિપિંગમંત્રી મનસુખ માંડવિયા, શિક્ષણમંત્રી ભૂપેન્દ્રસિંહ ચૂડાસમા, મંત્રી વિભાવરીબેન દવે અને નેવીના અધિકારીઓ ઉપસ્થિત રહ્યા હતા.


INS વિરાટ જહાજને અલંગના શ્રીરામ ગ્રુપના ચેરમેન મુકેશભાઈ પટેલ દ્વારા ખરીદ કરવામાં આવ્યું હતું. આ જહાજ ફક્ત જહાજ નથી, પરંતુ સમગ્ર દેશની સંવેદના તેની સાથે જોડાયેલી છે. વિરાટે પોતાના કાર્યકાળ દરમિયાન ભારતીય નૌસેનામાં 30 વર્ષ સુધી મહત્ત્વપૂર્ણ ભૂમિકા અદા કરી હતી.


ગિનિસ બુક ઓફ વર્લ્ડ રેકોર્ડ્સમાં સ્થાન
ભારતનું ઐતિહાસિક યુદ્ધ જહાજ જેણે 30 વર્ષ સૌથી લાંબો સમય યુદ્ધ જહાજ તરીકે સેવા આપીને ગિનિસ બુક ઓફ વર્લ્ડ રેકોર્ડ્સમાં સ્થાન મેળવ્યું હતું. તે INS વિરાટ ભાવનગરના અલંગ એન્કર પોઈન્ટ પર ભંગાણ થવા માટે આવી પહોંચ્યું છે.