ડૉક્ટરે કહ્યું હતું કે સિઝેરિયન કરવું પડશે, 108ના સ્ટાફે કરાવી નોર્મલ ડિલિવરી

સુરત: 108ના ટેકનિશિયન અને પાઈલટે એક ગર્ભવતી મહિલાને એમ્બ્યુલન્સમાં જ ડિલિવરી કરાવી છે. આ મહિલાને ગર્ભમાં બાળક ઊંધું હોવા ઉપરાંત ગળામાં નાળ વિટળાયેલી હોવા સહિતની કેટલીક ગંભીર સમસ્યા હતી. મહિલાને પ્રાઈવેટ હોસ્પિટલના ડોક્ટરે ત્યાં સુધી કહી દીધું હતું કે તેમની નોર્મલ ડિલિવરી થઈ શકશે નહીં. તેમ છતાંય 108ના ઈએમટી શબ્બીર બેલીમ અને પાઈલટ તેજસ પટેલની નોર્મલ ડિલિવરી કરાવી હતી.

રવિવારે રાત્રે 108ને બાલકસ ગામેથી એક કોલ આવ્યો હતો. દર્દી એક ગર્ભવતી મહિલા હતી, જેને પ્રસુતિનો દુ:ખાવો ઉપડ્યો હતો. 108 દ્વારા મહિલાને સિવિલ હોસ્પિટલ લઈ જવાઈ રહી હતી. આ દરમિયાન મહિલાએ સ્ટાફને જણાવ્યું હતું કે, તેણે થોડા દિવસ પહેલા જ સોનોગ્રાફી કરાવી હતી, જેમાં બાળકના ગળામાં નાળ વિટળાયેલી હોવાનું ડૉક્ટરે જણાવ્યું હતું. મહિલાને 108 દ્વારા પહેલા તો ઓલપાડના આરોગ્ય કેન્દ્રમાં લઈ જવાઈ હતી. જોકે, ત્યાંના ડૉક્ટરોએ તેને સિવિલમાં લઈ જવા કહ્યું હતું.

મહિલાને સિવિલ લઈ જઈ રહેલી એમ્બ્યુલન્સ હોસ્પિટલથી 10 કિલોમીટર દૂર હતી ત્યારે જ તેને અસહ્ય દુ:ખાવો ઉપડ્યો હતો, અને તેની હાલત જોતાં 108ના સ્ટાફે ત્યાં જ તેની ડિલિવરી કરવાનું નક્કી કર્યું હતું. મહિલાનું બ્લડ પ્રેશર ઘટી ગયું હતું, અને તેને લોહી પણ ખૂબ જ વહી ગયું હતું. જેથી તેની ત્યાં જ ડિલિવરી કરાવવી જરુરી હતી.

ઈએમટી શબ્બીર બેલીમે ટાઈમ્સ ઓફ ઈન્ડિયા સાથે વાત કરતા જણાવ્યું હતું કે તેઓ 7 વર્ષથી ફરજ બજાવે છે, પરંતુ તેમણે પોતાની કરિયરમાં પહેલીવાર ડિલિવરી કરાવી છે. તેમણે અમદાવાદના ડૉક્ટરની ઓનલાઈન મદદ લઈને મહિલાની નોર્મલ ડિલિવરી કરાવી હતી. પેશન્ટનું બ્લડ પ્રેશર ખૂબ જ ડાઉન હતું, અને બ્લિડિંગ ઘણું થઈ રહ્યું હોવાથી આ કેસ પણ અમારા માટે ક્રિટિકલ હતો. જોકે, અંતે બધું સમૂસુતરું પાર પડ્યું હતું.