સુરતની 21 વર્ષીય યુવતીએ નપાસ થતાં ટૂંકાવ્યું જીવન, માતા-પિતાના માથે આભ તૂટી પડ્યું

સુરત: એકબાજુ જ્યાં રાજ્ય અને દેશ કોરોના વાયરસની આ મહામારીમાંથી પસાર થઈ રહ્યો છે ત્યાં બીજી બાજુ મોટા શહેરોમાં આપઘાતના કિસ્સાઓ વધી રહ્યા હોય તેવું લાગી રહ્યું છે. મોટા શહેરોમાં યુવાનોમાં આપઘાતના કિસ્સાઓનું પ્રમાણ વધુ જોવા મળી રહ્યું છે ત્યારે સુરતમાં આજે 21 વર્ષીય યુવતીએ ઘરમાં આત્મહત્યા કરી લેતા ચકચાર મચી જવા પામી છે. આ યુવતીએ ઈન્ટર્નશિપમાં નપાસ થતાં જીવન ટૂંકાવ્યું હોવાનું જાણવા મળી રહ્યું છે, તે ફિઝિયોથેરાપીનો અભ્યાસ કરતી હતી.

પ્રાપ્ત માહિતી મુજબ, પ્રિયંકાબા નામની 21 વર્ષીય યુવતી સુરતના અડાજણ વિસ્તારમાં રહેતી હતી અને તેના પિતા પેટ્રોલ પંપના માલિક છે. દીકરીના મોતના સમાચાર સાંભળીને માતા-પિતા આઘાતમાં સરી પડ્યા હતા અને બેભાન થઈ ગયા હતા. આ યુવતી રાજકોટમાં ફિઝિયોથેરાપીનો અભ્યાસ કરતી હતી અને સુરતની અલગ-અલગ હોસ્પિટલમાં ઈન્ટર્નશિપ કરતી હતી. આ 21 વર્ષીય યુવતીએ ઈન્ટર્નશિપમાં નપાસ થતાં આપઘાત કર્યો હોવાનું પ્રાથમિક તારણ સામે આવ્યું છે.

21 વર્ષીય યુવતીને તેનો પરિવાર તાત્કાલિક નજીકની હોસ્પિટલમાં લઈ ગયો હતો કે જ્યાં ડોક્ટર્સે આ યુવતીને મૃત જાહેર કરી હતી. ત્યારબાદ પોલીસને આ ઘટનાની જાણ કરવામાં આવી હતી. આ યુવતીના મૃતદેહને બાદમાં પોસ્ટમોર્ટમ માટે સિવિલમાં મોકલવામાં આવ્યો હતો.