સુરતઃ 3 વર્ષનું બાળક કારમાં લૉક થઈ ગયું, પોલીસ ઈન્સ્પેક્ટરે કાચ તોડીને બહાર કાઢ્યું

સુરતઃ ઘણી વખત સામાન્ય ભૂલનું ગંભીર પરિણામ ભોગવવું પડી શકે છે. શહેરના ઉધના વિસ્તારમાં 3 વર્ષનો એક બાળક કારમાં લૉક થઈ ગયો હતો. આ દરમિયાન ત્યાથી પસાર થઈ રહેલા પોલીસ ઈન્સ્પેક્ટરનું ધ્યાન જતા તેમણે સમયસર કારનો કાચ તોડીને બાળકને સહી સલામત બહાર કાઢી જીવ બચાવ્યો છે. આ સમગ્ર ઘટના ત્યા લગાવેલા સીસીટીવીમાં કેદ થઈ છે.

બનાવની વિગતો એવી છે કે ઉઘના વિસ્તારમાં સાઇ સમર્પણ સોસાયટી આવેલી છે. અહીંયા એક વેગનઆર કાર પાર્ક કરેલી હતી. દરમિયાન ઉધના વિસ્તારના પીઆઈ એમવી પટેલ પેટ્રોલિંગમાં હતા ત્યારે તેમનું ધ્યાન આ ઘટના પર ગયું હતું. પીઆઈ નીકળ્યા ત્યારે બાળકના પિતા તેને બહાર કાઢવાનો પ્રયત્ન કરી રહ્યા હતા. બાળક કારની અંદર હતું અને તેના હાથમાં કારની ચાવી હતી.

તેમણે બાળકને દરવાજો ખોલવા માટે ઈશારામાં સમજાવ્યું પરંતુ બાળક સમજી ન શક્યો. જેથી પોલીસ ઈન્સ્પેક્ટરે સમય સુચકતા વાપરીને કારનો કાચ તોડીને બાળકને બહાર કાઢ્યો હતો. આ ઘટના વાલીઓ માટે ચેતવણી રૂપ કિસ્સો છે. બાળકને કારમાં એકલા ન મૂકવા જોઈએ.