સુરતમાં માસ્ક નહીં પહેરનાર વ્યક્તિને ફટકારાયેલા દંડના મેમોમાં વર્ષ 2021ની તારીખ!

સુરત: કોરોના વાયરસની મહામારી દરમિયાન ઘરની બહાર નીકળો ત્યારે માસ્ક પહેરવું ફરજિયાત છે, માસ્ક નહીં પહેરનાર વ્યક્તિને રૂપિયા 1000નો દંડ ફટકારવામાં આવી રહ્યો છે. ત્યારે સુરતમાં એક વ્યક્તિને માસ્ક નહીં પહેરવા બદલ રૂપિયા 1000નો દંડ ફટકારવામાં આવ્યો પરંતુ, આ દંડની રસીદમાં જે તારીખ હતી તે વર્ષ 2021ની એટલે કે આગામી વર્ષની તારીખ હોવાનું જાણવા મળ્યું છે. ત્યારે માસ્ક નહીં પહેરવા બદલ કરાયેલા આ દંડની રસીદમાં અત્યારના સમય કરતા એક મહિના પછીની એટલે કે વર્ષ 2021ની તારીખ જાણવા મળતા આ મેમો ચર્ચાનું કારણ બન્યો છે.

વાત જાણે એમ છે કે સુરતમાં અદાણી કેમિકલ બ્રાન્ચમાં મેનેજર તરીકેની નોકરી કરતા યશદીપ પ્રજાપતિ તારીખ 1 ડિસેમ્બરના દિવસે સવારે 11 વાગ્યે અડાજણ પ્રથમ સર્કલની પાસે મિત્રોની સાથે ઊભા હતા. તેઓ ઉતાવળમાં માસ્ક પહેરવાનું ભૂલી ગયા હતા. ત્યારે 3 લોકો ખાનગી ડ્રેસમાં ત્યાં આવ્યા અને પોલીસની ઓળખ આપીને યશદીપ પ્રજાપતિને માસ્ક નહીં પહેરવા બદલ રૂપિયા 1000નો દંડ ભરવાનું જણાવ્યું હતું. તેમણે માસ્ક નહીં પહેર્યું હોવાનો ફોટો દેખાડીને રૂપિયા 1000નો દંડ ભરવાનું જણાવ્યું હતું.

યશદીપ પ્રજાપતિએ માસ્ક નહીં પહેરવા બદલ રૂપિયા 1000નો દંડ ભરી દીધા પછી તેની રસીદ જોતા તેમાં તારીખ આજથી એક મહિના પછીની એટલે કે 1-1-2021 લખી હોવાનું જાણવા મળ્યું હતું. તો શું પોલીસના મત મુજબ 2021નું નવું વર્ષ એક મહિના પહેલા જ આવી ગયું? સોશિયલ મીડિયા પર પણ માસ્ક નહીં ભરવા બદલ પોલીસે પકડાયેલી આ રસીદમાં વર્ષ 2021ની તારીખ લખી હોવાનો કિસ્સો ચર્ચાનો વિષય બન્યો છે.