સુરત: ક્રિકેટ રમીને આવ્યા પછી 27 વર્ષીય યુવકને ગભરામણ થવા લાગી, મોત નીપજ્યું

સુરત: છેલ્લાં કેટલાંક મહિનાઓમાં 40 વર્ષથી ઓછી વયના યુવાનોમાં હાર્ટ અટેકથી મોત થયાના ઘણાં કિસ્સા સામે આવ્યા છે. જેમાં રાજકોટમાં ક્રિકેટ રમતા રમતા યુવાનોને હાર્ટ અટેક આવ્યો હોવાના પણ કેટલાંક ચોંકાવનારા કિસ્સા નોંધાયા છે. કોરોના વાયરસની મહામારીની પહેલી અને બીજી લહેર પછી જાણે કે યુવાનોમાં હાર્ટ અટેકનું પ્રમાણ વધ્યું છે! માત્ર ગુજરાત જ નહીં સમગ્ર દેશમાં હાર્ટ અટેકથી યુવાનોના મોતની ઘણી ઘટનાઓ દરરોજ સામે આવી રહી છે. ત્યારે સુરતમાં પણ એક યુવકનું નાની ઉંમરમાં હાર્ટ અટેકના કારણે મોત થયું હોવાનું જાણવા મળી રહ્યું છે.

મળતી માહિતી મુજબ, સુરતમાં એક યુવક ક્રિકેટ રમીને ઘરે પરત આવ્યા બાદ અચાનક છાતીમાં બળતરા અને ગભરામણ થતા તેને તાત્કાલિક સારવાર અર્થે ખાનગી હોસ્પિટલમાં ખસેડાયો હતો. જ્યાં ટૂંકી સારવાર બાદ તેનું મોત નીપજ્યું હતું. હસતો રમતો 27 વર્ષીય યુવક અચાનક જ મોતને ભેટતા પરિવારમાં શોક છવાઈ ગયો હતો. 27 વર્ષીય યુવક કેનેડામાં એન્જિનિયરિંગનો અભ્યાસ કરતો હતો અને હાલમાં જ પરિવારને મળવા માટે સુરત આવ્યો હતો. પોલીસે હાલ તો અકસ્માત મોતનો ગુનો નોંધી તપાસ હાથ ધરી છે.

સુરતના વરાછામાં રહેતા 27 વર્ષીય યુવક પ્રશાંતનું અચાનક જ મોત નીપજ્યું હતું. પ્રશાંત સવારે હસતો રમતો હતો અને મિત્રો સાથે ક્રિકેટ રમવા ગયો હતો. ક્રિકેટ રમીને ઘરે પરત આવ્યો અને થોડી જ વારમાં ઘરમાં જ તેને અચાનક છાતીમાં બળતરા અને ગભરામણ થવા લાગી હતી. તેને તાત્કાલિક સારવાર અર્થે ખાનગી હોસ્પિટલમાં ખસેડવામાં આવ્યો હતો. જ્યાં ટૂંકી સારવાર બાદ તેનું મોત નીપજ્યું હતું. પ્રશાંત કેનેડામાં સિવિલ એન્જિનિયરિંગનો અભ્યાસ કરતો હતો. એકાદ વર્ષથી પ્રશાંત પરિવાર પાસે સુરત આવ્યો હતો અને ફરી કેનેડા જવાનો હતો.

રાજકોટમાં ક્રિકેટ રમતા રમતા યુવકને હાર્ટ અટેક આવ્યો

રાજકોટમાં ક્રિકેટ રમતા રમતા જીજ્ઞેશ ચૌહાણને હાર્ટ અટેક આવ્યો હતો અને તે મેદાનમાં જ ઢળી પડ્યો હતો. હાર્ટ અટેક આવતા જીજ્ઞેશનું મોત નીપજ્યું હતું. જીજ્ઞેશે 30 રનની ઇનિંગ પણ રમી હતી. જોકે આ ઇનિંગ તેની જિંદગીને અંતિમ ઇનિંગ સાબિત થઈ હતી. તેણે 30 રનની ઇનિંગ રમી હતી. બાદમાં આઉટ થઈને તે ખુરશી પર બેઠો હતો. ત્યારે જ અચાનક અટેક આવતા તે ખુરશી પરથી ઢળી પડ્યો હતો. જીજ્ઞેશને સારવાર માટે હોસ્પિટલ ખસેડ્યો હતો. ડૉક્ટરે તેને મૃત જાહેર કરતા મીડિયા જગતમાં શોકની લાગણી પ્રસરી ગઈ છે.