આવતા અઠવાડિયે શરૂ થશે સુરત-દુબઈ ફ્લાઈટ

સુરતઃ આવતા અઠવાડિયાથી વર્લ્ડના બે સૌથી મોટા ડાયમન્ડ ટ્રેડ સેન્ટર સુરત અને દુબઈ વચ્ચે ફ્લાઈટ શરૂ થવા જઈ રહી છે. એર ઈન્ડિયા એક્સપ્રેસ આ ફ્લાઈટ શરૂ કરવા જઈ રહી છે. જેનાથી સુરત અને દુબઈના વેપારીઓને પોતાના ડાયમન્ડ બિઝનેસને વિસ્તારવાની વિશાળ તકો ઉપલબ્ધ થશે. નોંધનીય છે કે સમગ્ર વિશ્વમાં દુબઈ રફ ડાયમન્ડનું બીજું સૌથી મોટું માર્કેટ છે. એર ઈન્ડિયાની આ ફ્લાઈટ અઠવાડિયામાં ત્રણ વાર સુરત અને દુબઈ વચ્ચે ઉડાન ભરશે. નોંધનીય છે કે સુરતમાં નાના અને મોટા એમ આશરે 4,500 જેટલા ડાયમન્ડ પ્રોસેસિંગ યુનિટ્સ કાર્યરત છે. એર ઈન્ડિયા સુરત અને દુબઈ વચ્ચેની આ ફ્લાઈટ સેવા શરૂ થવાથી ડાયમન્ડ વેપારીઓને બિઝનેસ વિસ્તારવાની અઢળક તકો ઉપલબ્ધ થશે તેમજ સમયનો વ્યય પણ ઓછો થશે. દુબઈમાં અનેક ભારતીય ડાયમન્ડ કંપનીઓ અને લીડિંગ એક્સપોર્ટ હાઉસની ઓફિસ આવેલી છે. સુરત અને દુબઈ વચ્ચેની આ ઈન્ટરનેશનલ ફ્લાઈટ ગત વર્ષે જ 15 મેના રોજ શરૂ થવાની હતી પરંતુ 2,250 મીટર લાંબા રનવેનું વિસ્તરણ 2,950 મીટર સુધી વધારવામાં આ પ્રોજેક્ટને મોડું થયું હતું. એર ઈન્ડિયાની બોઈંગ 737-800 ફ્લાઈટ 189 સીટ ધરાવતી હશે. એર ઈન્ડિયાને આશા છે કે સુરત-દુબઈ ઈન્ટરનેશનલ ફ્લાઈટમાં સરેરાશ 50થી 60 ટકા જેટલો ટ્રાફિક રહેશે. આ ઉપરાંત ઓક્ટોબર 2018 સુધીમાં સુરતથી શારજહાંને પણ ફ્લાઈટ વડે કનેક્ટ કરવામાં આવશે. હાલ સુરતના ડાયમન્ડ વેપારીઓને દુબઈ જવા માટે ફ્લાઈટ માટે મુંબઈ જવું પડે છે. એક અંદાજ મુજબ આશરે ચાલીસ ટકા જેટલા ડાયમન્ડ ટ્રેડર્સ દુબઈ બિઝનેસ કરવા માટે મુંબઈથી ફ્લાઈટમાં જાય છે અને સાંજે પરત ફરે છે. સુરતથી દુબઈની ડાયરેક્ટ ફ્લાઈટ શરૂ થવાના કારણે ડાયમન્ડ ડિલર્સ બિઝનેસ કરવામાં ઘણી સગવડતા મળી રહેશે. આ ઉપરાંત દુબઈ આફ્રિકન કન્ટ્રીઝ માટે ગેટવે માનવામાં આવે છે. જેથી સુરતના વેપારીઓને આફ્રિકન કન્ટ્રીઝમાં પહોંચવું પણ સરળ બની રહેશે.