દિવાળી પહેલા અંકલેશ્વરની IIFL બ્રાંચમાંથી 3 કરોડથી વધુ સોનાની લૂંટ કરનારા ચાર ઝડપાયા

અંકલેશ્વરઃ દિવાળીના પાંચ દિવસ પહેલા ગત 9 નવેમ્બરના રોજ અંકલેશ્વર ત્રણ રસ્તા પાસે આવેલી IIFL ગોલ્ડ લોન ફાઈનાન્સની ઓફિસમાંથી ચાર લૂંટારૂઓએ રીવોલ્વર અને છરા સાથે ઘૂસી આવ્યા હતા. સ્ટાફને રીવોલ્વર બતાવીને સ્ટ્રોંગ રૂમનું લોક ખોલાવી રોકડ અને સોનું મળી કુલ 3.32 કરોડ રૂપિયાની લૂંટ ચલાવીને ફરાર થઈ ગયા હતા. પોલીસે આ ચારેય લૂંટારુઓને સુરતથી ઝડપી પાડ્યા છે.


આ ઘટના બાદ પોલીસે કારના નંબરને આધારે લૂંટારુઓની શોધખોળ હાથ ધરી હતી. નંબરના આધારે જાણવા મળ્યું કે આરોપીઓ સુરતના રાંદેર વિસ્તારમાં છે. જેથી પોલીસે રેડ કરીને મોહસીન ઈમ્તિયાઝ ગુલામ મુસ્તુફા (33), મોહમ્મદઅલી હુસૈન ગુલામ નાખુદા (29), મોહસીન મુસ્તુફા જીલાની ખલીફા(28) અને સલીમ અબ્દુલ સિદ્દીક ખાન(29) ની અટકાત કરી તેમને ભરૂચ જીલ્લા એલસીબી ઓફિસે સઘન પુછપરછ કરવામાં આવી હતી.


આ દરમિયાન તમામ આરોપીઓ ભાંગી પડ્યા અને તેમણે નવ દિવસ પહેલા અંકલેશ્વર IIFL બ્રાંચમાં થયેલી લૂંટની કબુલાત કરી હતી. આ સાથે ત્રણ વર્ષ પહેલા નવસારી ચીખલીમાં IIFL બ્રાંચમાં ઉપરોક્ત પકડાયેલા આરોપી પૈકી મોહસીન ઈમ્તિયાઝ ગુલામ મુસ્તુફા મલેક તથા સલીમ ખાને તે લૂંટ કરી હોવાની કબુલાત કરી હતી. પોલીસે આરોપી સાથેથી 2.52 કરોડના સોના સહિત કુલ 2.73 કરોડ રૂપિયાનો મુદ્દામાલ કબજે કર્યો છે. લૂંટ બાદ આરોપીઓએ સોનાના જથ્થામાંથી 700 ગ્રામ સોનું 30 લાખ રૂપિયામાં વહેંચી દીધું હતું જે પૈકી 12 લાખ રૂપિયા મળી આવ્યા છે જ્યારે 18 લાખ રૂપિયા આરોપી પાસેથી રીકવરી કરવાના બાકી છે.

કેવી રીતે ઘટનાને અંજામ આપ્યોગુનાનો મુખ્ય આરોપી મોહસીન 2011માં સાઉથ ઝોન વાપી ખાતે IIFL ગોલ્ડ લોનમાં રીકવરી મેનેજર તરીકે એક વર્ષ સુધી નોકરી કરી હતી. જેથી આ આરોપીએ બેંકની કાર્યશૈલીથી વાકેફ હતો. તેણે અન્ય સાથીઓ સાથે મળીને લૂંટનું પ્લાનિંગ કર્યું. પહેલા તેઓ ભરૂચ સીટીમાં આવેલી IIFL બ્રાંચની રેકી કરી હતી પરંતુ કેમેરા હોવાથી ભાગવાનો રૂટ અઘરો લાગ્યો હતો. તેથી તેમણે અંકલેશ્વર વિસ્તારમા રેકી કરી આ લૂંટને અંજામ આપ્યો હતો.