અબજોપતિ હીરાના વેપારીએ દીકરા પાસે કરાવી મજુરી

ટી.સી. શ્રીમોલ-આર.કે.શ્રીજીથ, કોચી: સાવજી ધોળકિયા સુરતમાં હીરાનો વેપાર કરે છે. તેમની કંપની હરે કૃષ્ણા ડાયમંડ એક્સપોર્ટસ 6000 કરોડની કંપની છે અને 71 દેશોમાં ફેલાયેલી છે. જો સાવજી ઈચ્છતા તો તેમના દીકરાને દુનિયાભરની સુખ સગવડો પુરી પાડી શકતા હતા, પણ તે અલગ પ્રકારના માણસ છે. તેમની વિચારધારા થોડી અલગ છે.

સાવજીએ પોતાના 21 વર્ષના દીકરા દ્રવ્ય ધોળકિયાને એક મહિના માટે સામાન્ય જીવન જીવવા અને સામાન્ય નોકરી કરવાનું કહ્યું. દ્રવ્ય અમેરિકાથી મેનેજમેન્ટનો અભ્યાસ કરી રહ્યો છે અને અત્યારે રજાઓ માણવા ભારત આવ્યો છે. 21 જૂનના રોજ તે 3 જોડ કપડાં અને માત્ર 7000 રુપિયા લઈને કોચી ગયો હતો. પિતાનો આદેશ હતો કે તેની પાસે જે 7000 રુપિયા છે, તે પણ અત્યંત જરુરી હોય તો જ વાપરે.

સાવજી કહે છે કે, મેં મારા દીકરાને કહ્યું કે તેણે પોતાના માટે પૈસા કમાવવા માટે કામ કરવું પડશે. તેણે કોઈ એક જગ્યાએ એક અઠવાડિયાથી વધારે સમય માટે નોકરી ના કરવી. મોબાઈલનો ઉપયોગ નથી કરી શકતો, અને તેના પિતાની ઓળખ પણ કોઈને ના આપી શકે. તેમજ ઘરેથી જે 7000 રુપિયા મળ્યા છે, તે પણ વાપરી નથી શકતો. સાવજી કહે છે કે, હું ઈચ્છતો હતો કે જે જીવનને સમજે અને જુએ કે ગરીબ લોકો કઈ રીતે નોકરી અને પૈસા કમાવવા માટે સંઘર્ષ કરે છે. કોઈ પણ યુનિવર્સીટી તમને જીવનના આ પાઠ નથી શીખવી શકતી, માત્ર અનુભવો પરથી જ શીખી શકાય છે.

આ પહેલાં સાવજીનું નામ ત્યારે ચર્ચામાં આવ્યું હતું જ્યારે તેમણે પોતાની કંપનીના કર્મચારીઓને બોનસ તરીકે કાર અને ફ્લેટ્સ ગીફ્ટ કર્યા હતા. દ્રવ્યએ પિતાએ આપેલા ચેલેન્જનો સ્વીકાર કર્યો હતો. તે કોઈ નવી જગ્યાએ જવા ઈચ્છતો હતો, જ્યાં તેને કોઈ ઓળખતું ના હોય અને ત્યાંની ભાષાથી પણ અજાણ હોય. સાવજી કહે છે કે તેણે કોચી જવાનો નિર્ણય કર્યો, તેને મલયાલમ ભાષા આવડતી નથી અને ત્યાં સામાન્ય રીતે હિન્દી ભાષા બોલાતી નથી.

પોતાના અનુભવો વિશે જણાવતાં દ્વવ્ય કહે છે કે, શરુઆતના પાંચ દિવસ તો મારી પાસે ના તો નોકરી હતી, ના રહેવા માટે જગ્યા. હું 60 જગ્યાઓએ નોકરી માંગવા ગયો પણ લોકોએ મને ના પાડી દીધી. મને સમજાયું કે લોકો માટે નોકરીનું શું મહત્વ હોય છે. તે જ્યાં પણ ગયો તેણે ખોટી કહાની કહી. તેણે કહ્યું કે તે ગુજરાતના એક ગરીબ કુટુંબમાં જન્મ્યો છે અને માત્ર ધોરણ 12 સુધી જ ભણી શક્યો છે. તેને પહેલી નોકરી એક બેકરીમાં મળી. ત્યારબાદ કોલ સેન્ટર, પગરખાંની દુકાન અને મેકડૉનલ્સમાં કામ કર્યુ. અલગ અલગ સ્થળોએ કામ કરીને તેણે એક મહિનામાં 4000 રુપિયા ભેગા કર્યા.