સુરત: હાઈવે પર પડેલા ખાડાને લીધે પડ્યો બાઈકચાલક, ટ્રક નીચે કચડાતાં થયું મોત

સુરત: નેશનલ હાઈવે પર પડેલો ખાડો એક બાઈકચાલક માટે જીવલેણ નીવડ્યો છે. સુરતના પલસાણા નજીક રસ્તા પર પડેલા ખાડાને કારણે સ્લીપ થઈ ગયેલા બાઈકચાલક પર ટ્રક ફરી વળતાં તેનું કરુણ મોત થયું હતું. કરણ ગામ નજીક નેશનલ હાઈવે 48 પર સંતોષ સિંહ (ઉં. 44 વર્ષ) પસાર થઈ રહ્યા હતા, ત્યારે મોsouટા ખાડામાં તેમનું બાઈક પછડાતાં તેમણે સંતુલન ગુમાવ્યું હતું, અને પડી ગયા હતા. હવે ટેલિગ્રામ પર મેળવો દરેક મહત્વના સમાચાર, અમારી ચેનલ સબસ્ક્રાઈબ કરવા ક્લિક કરો સંતોષ સિંહ રસ્તા પર પડ્યા ત્યારે જ પાછળ ટ્રક આવી રહ્યો હતો, જે તેમના પર ફરી વળતાં તેઓ ઘટનાસ્થળે જ મોતને ભેટ્યા હતા. આ ઘટનાથી ગુસ્સે ભરાયેલા ગ્રામજનોએ ચાર કલાક સુધી હાઈવે પર ચક્કાજમ કરી ભંગાર રસ્તા બાબતે વિરોધ પ્રદર્શન કર્યું હતું. આખરે હાઈવે ઓથોરિટીના અધિકારીઓ અને પોલીસ દ્વારા 24 કલાકમાં રસ્તા રિપેર કરી દેવાની ખાત્રી અપાતા ગ્રામજનોએ આંદોલન સમેટ્યું હતું. મૃતક સંતોષ સિંહ ખોડિયારનગરમાં રહેતા હતા, અને બાલેશ્વરમાં આવેલી મિલમાં ગાર્ડ તરીકે કામ કરતા હતા. તેમના ભાઈએ ટ્રક ડ્રાઈવર સામે ફરિયાદ નોંધાવી છે. જોકે, ટ્રક ડ્રાઈવર હાલ ફરાર છે. સુરત જિલ્લા એસપી એએમ મુનિયાએ જણાવ્યું હતું કે, આ મામલે તપાસ શરુ કરવામાં આવી છે અને તેમાં જે પણ જવાબદાર હશે તેની સામે પગલાં લેવામાં આવશે. સ્થાનિકો હાઈવે પર પડેલા ખાડા અંગે વારંવાર વિરોધ પ્રદર્શન કરતા રહે છે. રસ્તા બિસ્માર હાલતમાં હોવાથી તેના પર અવારનવાર અકસ્માત પણ થાય છે. જોકે, રિપેરિંગનું કામ ગોકળગતિએ કરાઈ રહ્યું છે. તેમાંય ચાલથાણથી કામરેજનો 20 કિમીનો હાઈવે તો સાવ ભંગાર હાલતમાં છે. પલસાણા પોલીસે આ અંગે ટ્રક ડ્રાઈવર ઉપરાંત NHAIના અધિકારીઓ અને કોન્ટ્રાક્ટર સામે પણ ગુનો નોંધ્યો છે.