નિયમો માત્ર જનતા માટે? ભાજપ નેતાના લગ્નમાં મહેમાનો DJના તાલે માસ્ક વિના નાચ્યા

કોરોના મહામારીને ધ્યાનમાં રાખીને સરકારે બહાર પાડેલી ગાઈડલાઈન્સ પ્રમાણે લગ્નમાં માત્ર 100 મહેમાનોને જ આમંત્રિત કરવાની મંજૂરી છે. તેમ છતાં અત્યારસુધીમાં કેટલાય લોકો તેનું ઉલ્લંઘન કરતાં ઝડપાયા છે. જેમાં નેતાઓ પણ સામેલ છે. આ વાતને લઈને ગુજરાત હાઈકોર્ટ રાજ્ય સરકારને વખોડી ચૂક્યું છે, ત્યારે વધુ એક ભાજપ આગેવાને પોતાના લગ્ન પહેલા યોજાયેલી સંગીત સંધ્યામાં સેંકડો લોકોને આમંત્રિત કરીને ગાઈડલાઈનનું ઉલ્લંઘન કર્યું હતું.

થોડા દિવસ પહેલા, પૂર્વ મંત્રી કાંતિ ગામિત સહિત 18 લોકોની એક કાર્યક્રમનું આયોજન કરવા બદલ ધરપકડ કરવામાં આવી હતી, જેમાં આશરે 5 હજાર લોકો એકઠાં થયા હતા. હવે ધરમપુર તાલુકાના ભાજપ પ્રમુખ કેતન વાઢુએ ગાઈડલાઈન્સના લીરેલીરા ઉડાડ્યા છે. વાઢુની સંગીત સંધ્યામાં મોટી સંખ્યામાં કાર્યકરો માસ્ક વગર અને સોશિયલ ડિસ્ટન્સિંગનું ઉલ્લંઘન કરીને ડાન્સ કરતાં જોવા મળ્યા હતા. પોલીસે વાઢુ સહિત 11 લોકો સામે ગુનો નોંધ્યો છે અને આઠની ધરપકડ કરી છે.

26મી ડિસેમ્બરે સંગીત સંધ્યામાં યોજાયેલી DJ પાર્ટીનો વીડિયો સોમવારે સવારે સોશિયલ મીડિયામાં વાયરલ થયો હતો. વીડિયો બાદ પોલીસે કાર્યવાહી હાથ ધરી હતી અને ફરિયાદ નોંધી હતી.

વલસાડ પોલીસ સુપ્રીટેન્ડેન્ટ ડો. રાજદીપસિંહ ઝાલાએ જણાવ્યું હતું કે, 'કાર્યક્રમમાં મોટી સંખ્યામાં લોકો એકત્રિત થયા હોવાનું અને કોવિડ 19ની ગાઈડલાઈન્સનું ઉલ્લંઘન થયું હોવાનું જાણ્યા બાદ પોલીસે કાર્યવાહી કરી હતી. કાર્યક્રમ વાઢુ અને તેના પિતરાઈ ભાઈના લગ્ન સમારોહનો એક ભાગ હતો'.

અગાઉ, ગુજરાત હાઈકોર્ટે એક ફેમિલી ફંક્શનમાં ભાજપના ધારાસભ્ય કાંતિ ગામિત દ્વારા કોવિડ-19ના તમામ પ્રોટોકોલ અને માર્ગદર્શિકાનું ઉલ્લંઘન કરવા બદલ આંચકો વ્યક્ત કર્યો હતો. વીડિયો ક્લિપ સોશિયલ મીડિયા પર વાયરલ થઈ હતી, જેમાં 5 હજાર લોકો તેમના પૌત્રની સગાઈમાં ઉપસ્થિત રહ્યા હતા. જેમાંથી મોટાભાગનાએ માસ્ક નહોતું પહેર્યું અને કોવિડ-19ની ગાઈડલાઈન્સનું ઉલ્લંઘન કરી રહ્યા હતા.

આ પહેલીવાર નથી જ્યારે હાઈકોર્ટે કોવિડના નિયમોનું ઉલ્લંઘન કરવા માટે નેતાઓને ઠપકો આપ્યો હતો. સપ્ટેમ્બરમાં હાઇકોર્ટે નિયમોનું ઉલ્લંઘન કરવા બદલ નેતાઓની આકરી ટીકા કરતાં અવલોકન કર્યું હતું કે, 'રાજ્ય દ્વારા સૂચવવામાં આવેલા પ્રોટોકોલનું પાલન થવું જ જોઈએ. આ રાજ્યના નેતાઓ તે પછી સીનિયર હોય કે જુનિયર તેમને પણ લાગુ પડે છે. રાજકીય નેતાઓ ઉલ્લંઘન કરશે તો સામાન્ય જનતા પણ તેમને જોઈને શીખશે'.