સુરતમાં ગમખ્વાર અકસ્માત, CAની પરીક્ષા આપવા આવેલા વિદ્યાર્થીને એમ્બુલન્સે અડફેટે લેતા મોત

રાજ્યમાં અકસ્માતના બનાવો વધી રહ્યા છે અને દરરોજ અકસ્માતને કારણે અનેક લોકો જીવ ગુમાવી રહ્યા છે ત્યારે સુરતમાંથી એક ગમખ્વાર અકસ્માતનો એક વીડિયો સામે આવ્યો છે. જેમા એક યુવક BRTS રૂટ પર જવા જાય છે ત્યારે એમ્બુલન્સ તેને અડફેટે લઈ લે છે. એમ્બુલન્સની જોરદાર ટક્કર વાગતા યુવક 5 ફૂટ દૂર ફેંકાયો હતો. યુવકને સારવાર માટે ખાનગી હૉસ્પિટલમાં ખસેડ્યો હતો. જ્યા તેનું સારવાર દરમિયાન મોત થયુ હતુ.

મુળ અમરેલીનો વતની હાલ અમદાવાદમાં રહીને અનિલ ગોધાણી નામનો 21 વર્ષીય CAનો અભ્યાસ કરતો હતો. અનિલની CAની પરીક્ષાનું કેન્દ્ર સુરતમાં આવ્યુ હતુ, જેથી પરીક્ષા આપવા માટે સુરત ગયો હતો. સુરતમાં તે તેના સબંધીના સરથાણા સ્થિત શિવાય હાઈટ્સમાં રોકાયો હતો. આ દરમિયાન સિમાડા નાકા ઉમંગ હાઈટ્સ પાસે આવેલી BRTS રોડ અનિલ ક્રોસ કરવા જતો હતો, ત્યારે તે પૂરઝપાટે આવી રહેલી એમ્બુલન્સની ઝપેટમાં આવી ગયો હતો. એમ્બુલન્સની ટક્કર વાગતા અનિલ પાંચ ફૂટ દૂર ફેંકાયો હતો. અકસ્માતમાં ગંભીર રીતે ઘવાયેલા અનિલને સારવાર માટે ખાનગી હૉસ્પિટલ ખસેડવામાં આવ્યો હતો. અનિલને માથા અને બાવડા સહિત શરીરના અન્ય ભાગે ફ્રેક્ચર જેવી ગંભીર ઇજાઓ પોહચી હતી. જેના કારણે ટૂંકી સારવાર બાદ પરિવારના આશાસ્પદ અનિલનું હોસ્પિટલના બિછાને મોત નિપજ્યું હતું.પરિવારના આશાસ્પદ વિધાર્થીના મોતના પગલે પરિવાર પર આભ તૂટી પડ્યુ હતું.

પોલીસે ગુનો નોંધી તપાસ હાથ ધરી
ઘટના બાદ સરથાણા પોલીસે પરિવારના સભ્યની ફરિયાદના આધારે ગુનો નોંધી તપાસ શરૂ કરી હતી.પોલીસ તપાસમાં સામે આવેલ સીસીટીવી ફૂટેજમાં પણ બેફામ દોડતી એમ્બ્યુલન્સના ચાલકે વિધાર્થીને અડફેટે લેતો હોય તેમ ઘટના સીસીટીવી કેમેરામાં કેદ થઈ હતી.સીસીટીવી ફૂટેજના આધારે પોલીસે એમ્બ્યુલન્સના ચાલકની શોધખોળ હાથ ધરી છે.