આઠવા ઝોનમાં સૌથી વધુ કેસ થઈ ગયા
સુરત મ્યુનિસિપલ કોર્પોરેશન (એસએમસી)ના અધિકારીઓના જણાવ્યા પ્રમાણે છેલ્લા કેટલાક દિવસોમાં આઠવા ઝોનમાં સૌથી વધારે કેસ નોંધાયા છે. સપ્ટેમ્બર 1 સુધી આઠવા ઝોનમાં 2393 કેસ નોંધાયા હતા જે વધીને 26 સપ્ટેમ્બર સુધીમાં 3709 કેસ થઈ ગયા છે. આમ હવે આઠવા ઝોન સુરતમાં સૌથી વધુ કોરોના કેસ ધરાવતો વિસ્તાર બની ગયો છે.
ટેક્સ્ટાઈલ ઈન્ડિસ્ટ્રીના કારણે વધ્યા છે કેસ
એસએમસી કમિશનર બંચ્છાનિધી પાનીએ અમારા સહયોગી ટાઈમ્સ ઓફ ઈન્ડિયા સાથેની વાતચીતમાં જણાવ્યું હતું કે આઠવા ઝોનમાં વધી રહેલા કેસને જોતા કોવિડ-19ને નિયંત્રણમાં રાખવા માટે અમે ત્રણ ટીમો બનાવી છે. આઠવા ઝોનમાં ટેક્સ્ટાઈલ ઈન્ડસ્ટ્રી હોવાના કારણે કેસની સંખ્યા વધી છે. તેમણે કહ્યું હતું કે ટેક્સ્ટાઈલ ઈન્ડસ્ટ્રીમાં કામ કરતા મોટા ભાગના લોકો આ ઝોનમાં રહે છે. અમે આઠવા ઝોનમાં ત્રણ ટીમો મૂકી છે. કોવિડ-19ના વધુમાં વધુ કેસ ડિટેક્ટ કરવા માટે કામગીરી હાથ ધરવામાં આવી છે.
અન્ય ત્રણ વિસ્તારો કોવિડ-19ના હોટસ્પોટ બન્યા
આઠવા ઝોન ઉપરાંત સિટી લાઈટ, આલ્ઠાન અને વેસુ હવે કોવિડ-19 હોટસ્પોટ બન્યા છે અને સૌથી વધુ કેસ આ વિસ્તારમાંથી નોંધાયા છે. અમે ટેક્સ્ટાઈલ માર્કેટ્સમાં ટેસ્ટિંગની કામગીરી હાથ ધરી છે. આ ઉપરાંત લોકો માસ્ક પહેરે, સેનિટાઈઝરનો ઉપયોગ કરે અને સોશિયલ ડિસ્ટન્સિંગનું પાનલ કરે તે સુનિશ્ચિત કરવા માટે એન્ફોર્સમેન્ટ ટીમો આઠવા ઝોનમાં તૈનાત કરવામાં આવી છે. આ ગાઈડલાઈન લોકોને કોરોનાના ચેપથી બચાવશે.
સુરત જિલ્લામાં રવિવાર સુધી 7,291 કેસ થયા
સુરત શહેર ઉપરાંત સુરત જિલ્લામાં પણ કોરોનાના કેસ વધ્યા છે. દૈનિક કેસની સંખ્યા 100થી ઉપર રહે છે. સુરત ગ્રામ્યમાં રવિવારે કોરોનાના 109 નવા કેસ નોંધાયા હતા. આ સાથે સુરત જિલ્લામાં કુલ કેસની સંખ્યા 7,291 પર પહોંચી ગઈ છે. સુરત જિલ્લામાં અત્યાર સુધી કોરોનાથી 244 લોકોના મૃત્યુ થયા છે.