સુરતમાં કોરોના વોરિયર ડોક્ટરનું નિધન, પાર્થિવ દેહને તિરંગામાં લપેટી આપી અંતિમ વિદાય

વિનસ હોસ્પિટલના ડોક્ટર હિતેશ લાઠીયા ફક્ત 34 વર્ષના જ હતા. તેઓ કોરોનાના દર્દીઓની સારવાર કરતા હતા અને અંતે કોરોનાએ જ તેમનો ભોગ લીધો. તેઓ વિનસ હોસ્પિટલમાં કોવિડ વોર્ડના આરએમઓ તરીકેની જવાબદારી સંભાળી રહ્યા હતા. તેમના નિધનથી સુરતના તબીબી ક્ષેત્રમાં આઘાતની લાગણી વ્યાપી ગઈ છે.

કોરોના વોરિયર ડોક્ટર હિતેશ લાઠીયાના નિધનથી તબીબી જગતમાં શોક વ્યાપ્યો છે. જોકે, વિનસ હોસ્પિટલના સ્ટાફે તેમને છાજે એવી શ્રદ્ધાંજલિ અર્પી હતી. તેમના પાર્થિવ દેહને તિરંગામાં લપેટીને તેમને અંતિમ વિદાય આપી હતી. પરિવારજનોએ પરિક્રમા કરીને તેમને અંતિમ વિદાય આપી હતી. ડોક્ટર હિતેશ છેલ્લા દોઢ વર્ષથી હોસ્પિટલમાં ફરજ બજાવી રહ્યા હતા. તેઓ આઈસીયુ, ઈમર્જન્સી, જનરલ એમ પ્રત્યેક વોર્ડમાં કામ કરતા હતા. વિનસ હોસ્પિટલ મેનેજમેન્ટ તથા સ્ટાફે ડોક્ટરને બચાવવા માટે ભારે મહેનત કરી હતી પરંતુ તેઓ તેમને બચાવી શક્યા નહીં. તેમને ચાર દિવસ વેન્ટિલેટર પર અને 5 દિવસ એડવાન્સ ઈસીએમઓ મશીન પર રાખવામાં આવ્યા હતા પરંતુ તેમની તબીયતમાં કોઈ સુધારો થયો ન હતો.

સુરતમાં કોરોનાથી પરિસ્થિતિ વકરી રહી છે. ગઈ કાલે સુરતમાં કોરોનાના 194 નવા કેસ સામે આવ્યા હતા. જ્યારે 141 દર્દીઓ ડિસ્ચાર્જ થયા હતા. સુરત જિલ્લામાં 51 કેસ નોંધાયા હતા પરંતુ તેની સામે 72 દર્દીઓ સાજા થયા હતા. સુરતમાં 8 અને સુરત જિલ્લામાં ત્રણ વ્યક્તિઓના મૃત્યુ થયા હતા.